មន្ត្រីអ៊ុយក្រែន បាននិយាយថាការវាយប្រហាររបស់រុស្ស៊ី ទៅលើពិធីរំលឹកខួប នៅក្នុងភូមិមួយ នៅប្រទេសអ៊ុយក្រែនភាគឦសានកាលពីថ្ងៃព្រហស្បតិ៍បណ្តាលឲ្យមនុស្ស៥១នាក់ស្លាប់។

គំនរថ្មដ៏ច្រើន និងដែកនៅរាយប៉ាយ ព្រមទាំងសម្ភារៈអគារ ស្ថិតនៅកន្លែងដែលហាងកាហ្វេ និងហាងទំនិញរងការវាយប្រហារ នៅពេលរសៀល ក្នុងភូមិ Hroza ក្នុងតំបន់ Kharkiv ។

ការវាយប្រហារនេះ មានមនុស្សស្លាប់ច្រើនបំផុត នៅក្នុងតំបន់Kharkiv ចាប់តាំងពី​ការឈ្លានពាន​របស់រុស្ស៊ី រយៈពេលជាង១៩ខែមកនេះ ហើយទំនងជាមានចំនួនជនស៊ីវិលស្លាប់ច្រើនបំផុត ក្នុង​ការវាយប្រហាររបស់រុស្ស៊ី តែមួយលើក។

បុគ្គលិកជួយសង្គ្រោះ បានសែងការ៉ុងដាក់សាកសព នៅលើវាលមួយនៅជាប់សួនកុមារ និងបាន​ដាក់​សាកសពទៅលើរថយន្ត។

ប្រធានាធិបតី លោក Volodymyr Zelenskiy ដែលកំពុងចូលរួមកិច្ចប្រជុំកំពូល​ជាមួយ​មេដឹកនាំ​អឺរ៉ុប នៅក្នុងប្រទេសអេស្បាញ បាននិយាយថាភេរវជនរុស្ស៊ី គួតែត្រូវបានបញ្ឈប់។

ទីក្រុងមូស្គូ មិនបានធ្វើការអធិប្បយាភ្លាមៗនោះទេអំពីព្រឹត្តិការណ៍នៅក្នុងភូមិ Hroza នេះ៕