រដ្ឋមន្ត្រីក្រសួងបរិស្ថានឥណ្ឌូនេស៊ី បាននិយាយនៅថ្ងៃសុក្រនេះ មួយថ្ងៃបន្ទាប់ពីប្រទេសជិតខាងខ្លួន បានជំរុញឲ្យទីក្រុងហ្សាកាតា មានចំណាត់ការ ខណៈគុណភាពខ្យល់កាន់តែធ្ងន់ធ្ងរថា ចំហេះព្រៃ នៅក្នុងផ្នែកមួយចំនួន នៅប្រទេសឥណ្ឌូនេស៊ី បានថយចុះ ហើយគ្មានផ្សែងត្រូវបានមើលឃើញហុយទៅកាន់ប្រទេសម៉ាឡេស៊ីនោះទេ។

លោក Nik Nazmi Nik Ahmad រដ្ឋមន្ត្រីធនធានធម្មជាតិ បរិស្ថាន និងបម្រែបម្រួលអាកាសធាតុរបស់ម៉ាឡេស៊ី នៅក្នុងបទសម្ភាសន៍ជាមួយសារព័ត៌មានរ៉យទ័រ បាននិយាយថា លោកបានស្នើឲ្យសមភាគីឥណ្ឌូនេស៊ី របស់លោក ដោះស្រាយបញ្ហាផ្សែងហុយ។

លោក Siti Nurbaya រដ្ឋមន្ត្រីបរិស្ថាន បានប្រាប់សារព័ត៌មានរ៉យទ័រថា លោកមិនដឹងនូវអ្វីជាមូលដ្ឋាន ដែល ប្រទេសម៉ាឡេស៊ី បានប្រើប្រាស់ក្នុងការផ្តល់សេចក្តីថ្លែងការណ៍ទាំងនោះទេ។ យើងកំពុងធ្វើការមិនផ្អែកលើសំណើរបស់ប្រទេសម៉ាឡេស៊ីនោះទេ។

យោងតាមអ្នកវិទ្យាសាស្ត្រ បានឲ្យដឹងថា ចំហេះព្រៃ បានបញ្ជូនផ្សែង ហុយឡើងនៅទូទាំងតំបន់ ក្នុងឆ្នាំ២០១៥ និងឆ្នាំ២០១៩ ដែលបានឆេះលើផ្ទៃដីរាប់លានហិកតា និងបានបង្កើតបានជាការបំភាយខ្ពស់លើកំណត់ត្រា។

ស្ទើរតែគ្រប់រដូវក្តៅ ផ្សែងពីចំហេះព្រៃដើម្បីសម្អាតដីសម្រាប់ការដាំដំណាំដូងប្រេង ឈើសម្រាប់ផលិតក្តារបន្ទះ ក្រដាស់ និងដំណាំម្រេច នៅប្រទេសឥណ្ឌូនេស៊ី ដែលគ្របដណ្តប់ភាគច្រើននៅក្នុងតំបន់ នាំឲ្យមានហានិភ័យសុខភាព ប៉ះពាល់ប្រតិបត្តិករទេសចរណ៍ និងក្រុមហ៊ុនអាកាសចរណ៍ដែលពាក់ព័ន្ធ។

រដ្ឋមន្ត្រីប្រទេសឥណ្ឌូនេស៊ី បាននិយាយថា ចំនួនចំហេះព្រៃនៅក្នុងផ្នែកមួយចំនួននៅកោះស៊ូម៉ាត្រា និងកោះបណេអូ បានថយចុះ ហើយរដ្ឋាភិបាល បានបន្តពន្លត់អណ្តាតភ្លើងឆាបឆេះ។