អ៊ឺរ៉ុប ៖ ប្រមុខសហភាពអឺរ៉ុប លោក Charles Michel បានប្រាប់សារព័ត៌មាន AFP កាលពីថ្ងៃព្រហស្បតិ៍ថា សហភាពអឺរ៉ុប នឹងធ្វើជាម្ចាស់ផ្ទះការចរចារវាង មេដឹកនាំប្រទេសអាមេនី និងអាស៊ែរបៃហ្សង់នៅខែនេះ ដើម្បីព្យាយាមកាត់បន្ថយភាពតានតឹងរវាងសត្រូវទាំងពីរនេះ បន្ទាប់ពីការវាយលុកយ៉ាងរហ័សរបស់ទីក្រុងបាគូ នៅក្នុងតំបន់ណាហ្គ័ណូ-ការ៉ាបាក់។ លោក Michel បាននិយាយនៅក្រៅកិច្ចប្រជុំកំពូល សហគមន៍នយោបាយសហភាពអឺរ៉ុបចំនួន៤៧ ប្រទេស ក្នុងប្រទេសអេស្បាញថា គោលដៅ គឺត្រូវមានជំនួបនេះធ្វើឡើងនៅចុងខែតុលា ហើយយើងនឹងកំណត់កាលបរិច្ឆេទរួមគ្នា ជាមួយនាយករដ្ឋមន្ត្រីអាមេនី លោក Nikol Pashinyan និងប្រធានាធិបតីអាស៊ែរបៃហ្សង់លោក Ilham Aliyev ។

រយៈពេល២សប្តាហ៍កន្លងទៅនេះ ប្រទេសអាស៊ែរបៃហ្សង់ បានចូលគ្រប់គ្រងតំបន់ណាហ្គ័ណូ-ការ៉ាបាក់ជាតំបន់ផ្តាច់ខ្លួន ជាលើកដំបូង ក្នុងរយៈពេល៣ទសវត្សរ៍មកនេះ បន្ទាប់ពីការវាយលុក១ថ្ងៃ។ ប្រតិបត្តិការនេះ បានបង្កឲ្យមានការភៀសខ្លួនទ្រង់ទ្រាយធំនៃជនជាតិភាគតិចអាមេនី ក្នុងចំនួនភាគច្រើនប្រមាណ១២០.០០០នាក់ ដែលកំពុងរស់នៅលើទឹកដីនេះ ដោយភៀសខ្លួនចូលទៅកាន់ប្រទេសអាមេនី។ 

បណ្តាមេដឹកនាំអឺរ៉ុប ដែលមានតួនាទីកាន់តែកើនឡើងនៅក្នុងតំបន់ Caucasus បានសង្ឃឹមធ្វើជាម្ចាស់ផ្ទះនៅក្នុងប្រទេសអេស្បាញ នូវជំនួបដំបូងរបស់លោក Aliyev ជាមួយលោក Pashinyan ចាប់តាំងពីការវាយលុកនៅតំបន់ការ៉ាបាក់។

ប៉ុន្តែមេដឹកនាំអាស៊ែរបៃហ្សង់ បានច្រានចោលការចរចានេះ ដែលទីក្រុងបាគូ បានលើកឡើងពីគោលនយោបាយដាក់យោធារបស់ប្រទេសបារាំង ក្នុងតំបន់ Caucasus ជាឥរិយាបថរបស់សហភាពអឺរ៉ុបចំពោះតំបន់នេះ និងអវត្តមានរបស់ប្រទេសទួរគី ជាសម្ព័ន្ធមិត្តដ៏យូរលង់ របស់ទីក្រុងបាគូ។