ចិន ៖ សេដ្ឋកិច្ចពិភពលោកនៅតែបន្តងើបឡើងវិញក្នុងសភាពទន់ខ្សោយ ដូចដែលបានបង្ហាញដោយសន្ទស្សន៍គ្រប់គ្រងការបញ្ជាទិញផលិតកម្មសកល (PMI) ចំនួន៤៨,៧ភាគរយ នៅក្នុងខែកញ្ញា ដែលចេញផ្សាយដោយសហព័ន្ធភស្តុភារ និងការបញ្ជាទិញរបស់ប្រទេសចិន នៅថ្ងៃសុក្រ (៦ តុលា) នេះ។ 

សន្ទស្សន៍ PMI សកល បានកើនឡើងចំនួនត្រឹមតែ០,៤ភាគរយប៉ុណ្ណោះពីខែមុន ដោយបានកើនឡើងក្នុងល្បឿនដ៏យឺតរយៈពេល៣ខែជាប់ៗគ្នា។

លោក ស៊ូ ហុងខៃ អនុប្រធានគណៈកម្មការគោលនយោបាយសេដ្ឋកិច្ច ក្រោមសមាគមវិទ្យាសាស្ត្រគោលនយោបាយចិន បាននិយាយថា ការបន្តស្ទុះងើបឡើងវិញដ៏យឺតយ៉ាវនៃសេដ្ឋកិច្ចពិភពលោក នៅក្នុងត្រីមាសទី៣នេះ មិនបានផ្លាស់ប្តូរគំរូទូទៅនៃកំណើនដ៏ទាបនោះទេ។ 

ដោយបន្ថែមពីលើសម្ពាធជានិរន្តរភាពនៃការធ្លាក់ចុះនៃតម្រូវការ និងអតិផរណាទៅទៀតនោះ ផលប៉ះពាល់មិនច្បាស់លាស់នៃរបាំងពាណិជ្ជកម្ម គឺជាកត្តាខាងក្រៅដ៏សំខាន់មួយ ដែលរារាំងការងើបឡើងវិញនៃសេដ្ឋកិច្ចពិភពលោក។

លោកស៊ូ បានបញ្ជាក់ថា បណ្ដាប្រទេសជុំវិញពិភពលោក គួរតែបោះបង់ចោលនូវគំនិតនៃការប្រឈមមុខដាក់គ្នា កាត់បន្ថយ ឬជៀសវាងតែម្ដងនូវការប្រកួតប្រជែងផ្នែកពាណិជ្ជកម្ម ហើយឆ្ពោះទៅរកកិច្ចសហប្រតិបត្តិការ ដើម្បីផ្តល់ភាពងាយស្រួល និងឱកាសសហប្រតិបត្តិការបន្ថែមទៀត សម្រាប់ពាណិជ្ជកម្មពិភពលោក៕