អ៊ុយក្រែន ៖  អ៊ុយក្រែនប្រឈមនឹងរដូវរងារទី ២ជាមួយនឹងការដាច់ចរន្តអគ្គិសនីរយៈពេលយូរ ស្របពេលការវាយប្រហារដោយមីស៊ីល និងយានដ្រូនឥតឈប់ឈររបស់រុស្ស៊ី បានធ្វើឲ្យផ្នែកខ្លះនៃប្រព័ន្ធថាមពលអ៊ុយក្រែនងាយរងគ្រោះជាងកាលពីរយៈពេល ១ឆ្នាំមុន ។ 

 ក្រុមវិស្វកររាប់ពាន់នាក់ បានប្រឹងប្រែងអស់កម្លាំងកាយចិត្តកាលពីរដូវក្តៅ ដើម្បីជួសជុលប្រព័ន្ធអគ្គិសនីដែលរងការខូចខាត ហើយប្រព័ន្ធការពារដែនអាកាសល្អប្រសើរជាងមុន អាចជួយកាត់បន្ថយផលប៉ះពាល់ដោយសារសង្រ្គាម ស្របពេលដែលសីតុណ្ហភាព ចាប់ផ្តើមធ្លាក់ចុះ ។ 

 ប៉ុន្តែគ្មានប្រាក់ ឬពេលវេលាគ្រប់គ្រាន់នោះទេដើម្បីបញ្ចប់ការត្រៀមខ្លួនសម្រាប់រដូវរងារ ដែលនេះមានន័យថា ពេលយប់រយៈពេលយូរជាងមុននឹងគ្មានភ្លើង កម្តៅ និងទឹកសម្រាប់ពលរដ្ឋអ៊ុយក្រែនរាប់លាននាក់ ហើយវាកាន់តែរងគ្រោះខ្លាំងបំផុតសម្រាប់វិស័យធុរកិច្ច និងសេដ្ឋកិច្ចពួកគេ ។ 

 អ៊ុយក្រែន បានចោទប្រកាន់រុស្ស៊ីថាបានបំផ្លាញបំផ្លាញដោយចេតនាលើប្រព័ន្ធថាមពល ដើម្បីធ្វើឲ្យពួកគេរងគ្រោះក្នុងកម្រិតអតិបរមាលើមនុស្សធម្មតា គឺជាការចោទប្រកាន់មួយដែលទីក្រុងម៉ូស្គូ បានធ្វើការច្រានចោលទាំងស្រុង ។  

រុស្ស៊ីនិយាយថា ពួកគេគ្មានគោលដៅលើជនស៊ីវិលនោះទេ ពួកគេវាយប្រហារតែលើទីតាំងយោធាប៉ុណ្ណោះ ។ 

 ការខូចខាតពិតជាធំធេងខ្លាំងណាស់ ។ អ៊ុយក្រែនពុំបានចែករំលែកទិន្នន័យលម្អិតនោះទេលើផលប៉ះពាល់ដោយសារការវាយប្រហាររបស់រុស្ស៊ីមកលើប្រព័ន្ធថាមពល ពីព្រោះថាវាគឺជាព័ត៌មានរសើប អំឡុងសម័យសង្រ្គាម ៕