អូស្ត្រាលី ៖ ដោយនៅតែប៉ុន្មានថ្ងៃទៀតប៉ុណ្ណោះដល់ការបោះឆ្នោតប្រជាមតិជាប្រវត្តិសាស្ត្រស្តីពីសិទ្ធិជនជាតិដើមភាគតិច ក្នុងប្រទេសអូស្ត្រាលីនោះ ការរើសអើងជាតិសាសន៍ ដែលបានធ្វើឲ្យយុទ្ធនាការនេះកាន់តែអាប់អួអស់ជាច្រើនសប្តាហ៍ បានកើនឡើងកាន់តែខ្លាំង ចំពេលដែលមានការធ្លាក់ចុះនូវការគាំទ្រជាសាធារណៈ ចំពោះការផ្ដល់ «សំឡេងទៅកាន់សភា» ដែលត្រូវបានស្នើឡើង។

កាលពីថ្ងៃព្រហស្បត្តិ៍ (ទី៥ ខែតុលា) វីដេអូមួយត្រូវបានចេញផ្សាយនៅលើបណ្ដាញសង្គម ដែលបង្ហាញឲ្យឃើញពីបុរសពាក់អាវមានមួកគ្របក្បាលម្នាក់ បាននិយាយសម្ដីរើសអើងពួជសាសន៍ជាបន្តបន្ទាប់ប្រឆាំងនឹងជនជាតិដើមភាគតិច ហើយបន្ទាប់មកបានដុតទង់ជាតិជនជាតិដើមភាគតិច និងធ្វើការគោរពបែបណាស៊ី។

បុរសដែលមិនត្រូវបានគេស្គាល់អត្តសញ្ញាណនោះ ក៏បាននិយាយផងដែរដល់សមាជិកព្រឹទ្ធសភាសហព័ន្ធឯករាជ្យជនជាតិដើមភាគតិច លោកស្រី Lidia Thorpe ដែលត្រូវបានរើសអើងជាតិសាសន៍យ៉ាងច្រើន តាមប្រព័ន្ធអ៊ីនធឺណិត និងជួនកាលមានការគំរាមកំហែងដល់ជីវិតទៀតផង ចាប់តាំងពីលោកស្រីបានចូលប្រឡូកក្នុងឆាកនយោបាយក្នុងឆ្នាំ២០២០។ ការគំរាមកំហែងមានសភាពកាន់តែអាក្រក់ឡើងៗ មុននឹងឈានទៅដល់ការបោះឆ្នោតប្រជាមតិ ដែលគ្រោងធ្វើឡើងនៅថ្ងៃទី១៤ ខែតុលា។

ដោយមានការតូចចិត្ត និងខឹងសម្បា អំឡុងសន្និសីទសារព័ត៌មាន ដើម្បីជាការឆ្លើយតបនឹងវីដេអូ លោកស្រី Thorpe បានប្រាប់ថា៖ «មានមនុស្សចង់សម្លាប់ខ្ញុំ នៅទីនោះ។ ពួកគេមិនចង់ឲ្យគ្រប់គ្នាឮសំឡេងរបស់ខ្ញុំទេ»។ ជាមួយគ្នានេះ លោកស្រីបានរអ៊ូរទាំដាក់នាយករដ្ឋមន្ត្រី លោក Anthony Albanese ដោយចោទប្រកាន់នគរបាលថា មិនបានការពារលោកស្រី និងបានតវ៉ាប្រឆាំងនឹងអ្នកដែលផ្ញើវីដេអូនោះ។

យ៉ាងណាក្ដី កង្វះនូវការគាំទ្រ ក្នុងការផ្ដល់សំឡេងទៅកាន់សភានេះ គឺជាការបង្ហាញឲ្យឃើញនូវភាពផ្ទុយស្រឡះទៅនឹងការបោះឆ្នោតប្រជាមតិឆ្នាំ១៩៦៧ ដែលទទួលបានជោគជ័យយ៉ាងលើសលប់ ស្ដីពីសិទ្ធិជនជាតិដើមភាគតិច៕