ភ្នំពេញ៖ ឯកឧត្តមបណ្ឌិត ព្រហ្ម វិចិត្រអក្ខរា អ្នកនាំពាក្យក្រុមប្រឹក្សាធម្មនុញ្ញ បញ្ជាក់ថា ការសាងសង់វិមានរដ្ឋធម្មនុញ្ញ ដើម្បីរំលឹកដល់គុណបំណាច់បុព្វបុរសដែលបង្កើតរដ្ឋធម្មនុញ្ញ។

ស្របពេលក្រុមប្រឹក្សាធម្មនុញ្ញ នៅថ្ងៃទី៦ ខែតុលានេះ បានរៀបចំព្រះរាជពិធីអបអរសាទរខួប៣០ឆ្នាំនៃថ្ងៃបង្កើតរដ្ឋធម្មនុញ្ញ ក្រោមព្រះរាជវត្តមានដ៏ខ្ពង់ខ្ពស់បំផុតរបស់ព្រះករុណា សម្តេចព្រះបាទ បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ឯកឧត្តមបណ្ឌិត ព្រហ្ម វិចិត្រអក្ខរា បានប្រាប់ BTV ថា ការសាងសង់វិមានរដ្ឋធម្មនុញ្ញឡើង គឺមានការចង្អុលបង្ហាញដ៏ខ្ពង់ខ្ពស់ពីសំណាក់​សម្តេចអគ្គមហាសេនាបតីតេជោ ហ៊ុន សែន ក្នុងគោលបំណង​ឆ្លុះបញ្ចាំង​ដល់គុណតម្លៃ២ ទី១គុណតម្លៃប្រពៃណី និងទី២ គុណតម្លៃទំនើបដែលមានក្នុងរដ្ឋធម្មនុញ្ញ។

ឯកឧត្តមបណ្ឌិតបញ្ជាក់ថា ​ការសាងសង់វិមានរដ្ឋធម្មនុញ្ញ ដើម្បីរំលឹកដល់គុណបំណាច់​បុព្វបុរស​ដែលមាន​តួអង្គសំខាន់​ ជាពិសេសម្តេចព្រះបរមរតនកោដ្ឋ ​នរោត្តម សីហនុ និង​សម្តេចអគ្គ​មហាសេនា​បតីតេជោ ហ៊ុន សែន ក្នុងការចចារឲ្យមានកិច្ចព្រមព្រៀងទីក្រុងប៉ារីស រហូតឈានដល់បង្កើតរដ្ឋធម្មនុញ្ញ។

ឯកឧត្តមបណ្ឌិត ព្រហ្ម វិចិត្រអក្ខរា បានឲ្យដឹងថា ​សំណង់វិមាននេះនឹងមានវិមានឯករាជ្យ អមសងខាង​ដោយវិមានរដ្ឋធម្មនុញ្ញ ​និងព្រះបរមរតនកោដ្ឋ ​ហើយឆ្លុះបញ្ចាំងពីគោលការណ៍ឯករាជ្យ អព្យាក្រឹត​ដោយអាស្រ័យ​ទៅលើច្បាប់រដ្ឋធម្មនុញ្ញ ខណៈការសាងសង់សម្រេច​បានប្រមាណ ៥០ភាគរយ និងគ្រោងបញ្ចប់សាងសង់ពាក់កណ្តាលឆ្នាំ២០២៤។

សូមជម្រាបថា វិមានរដ្ឋធម្មនុញ្ញ នឹងក្លាយជានិមិត្តដល់យុវជនជំនាន់ក្រោយសិក្សារៀនសូត្រ​ស្វែងយល់​កាន់​តែច្បាស់​អំពីគុណតម្លៃរដ្ឋធម្មនុញ្ញ។ ​លើសពីនេះ វិមាននេះត្រូវបាន​ស្ថាបត្យកររៀបចំ​ពាក់ព័ន្ធ​នឹងការរចនា​នៅលើសន្លឹកទ្វារទាំង៤ ដែលឆ្លុះបញ្ចាំង​ទៅលើទស្សនៈគុណតម្លៃនៃរដ្ឋ​ធម្មនុញ្ញ​និយមទំនើប ​ដូចជា គុណតម្លៃនីតិរដ្ឋ, គុណតម្លៃប្រជាធិបតេយ្យ, គុណតម្លៃនៃការបែងចែក​អំណាចដាច់ពីគ្នានៃអំណាចទាំង៣ ​និងគុណតម្លៃនៃសិទ្ធិមនុស្ស៕អត្ថបទ សេក ឧត្តម