កូរ៉េខាងជើង ៖ ប្រព័ន្ធផ្សព្វផ្សាយរដ្ឋកូរ៉េខាងជើង នៅថ្ងៃសុក្រ (ទី៦ ខែតុលា) នេះ បានរិះគន់ប្រទេសបារាំង ជុំវិញការដាក់ពង្រាយយន្តហោះល្បាត ក្នុងដែនទឹកក្បែរឧបទ្វីបកូរ៉េ ដោយឲ្យឈ្មោះថា «ការទូតដោយប្រើកម្លាំងយោធាគំរាមកំហែងហួសសម័យ»។

ការរិះគន់នេះកើតឡើងបន្ទាប់ពីក្រសួងការបរទេសជប៉ុន បានប្រកាសនៅដើមសប្តាហ៍នេះថា ប្រទេសបារាំងនឹងឃ្លាំមើលសកម្មភាពដែនសមុទ្រខុសច្បាប់ ក្នុងនោះរួមទាំងការផ្ទេរពីកប៉ាល់ទៅកប៉ាល់ ដោយនាវាដែលមានទង់ជាតិកូរ៉េខាងជើង ដោយប្រើប្រាស់យន្តហោះពីមូលដ្ឋានអាកាស Futenma ក្នុងខេត្ត Okinawa របស់ប្រទេសជប៉ុន។

អ្នកស្រាវជ្រាវនៅឯសមាគមកូរ៉េ-អឺរ៉ុបរបស់កូរ៉េខាងជើង លោក Ryu Kyong-chol ក្នុងសេចក្តីថ្លែងការណ៍ ដែលធ្វើឡើងដោយប្រព័ន្ធផ្សព្វផ្សាយរដ្ឋ បាននិយាយថា ទង្វើនេះជា «ការទូតដោយប្រើកម្លាំងយោធាគំរាមកំហែងហួសសម័យ»។ លោក Ryu ក៏បានជំរុញផងដែរឲ្យប្រទេសបារាំងបញ្ឈប់សកម្មភាពគ្រោះថ្នាក់ ដែលគំរាមកំហែងដល់សន្តិភាពក្នុងតំបន់។

កាលពីដើមឆ្នាំនេះ ប្រព័ន្ធផ្សព្វផ្សាយរដ្ឋរបស់កូរ៉េខាងជើង ក៏បានរិះគន់បារាំងដូចគ្នាដែរ ជុំវិញសមយុទ្ធផ្លូវអាកាសរួមគ្នា ដែលធ្វើឡើងជាមួយកូរ៉េខាងត្បូង ដោយចាត់ទុកសមយុទ្ធនោះថា ជាការបង្កហេតុខាងយោធា៕