ប៉ាឡេស្ទីន ៖ ពួកសកម្មប្រយុទ្ធប៉ាឡេស្ទីននៅតំបន់ហ្គាហ្សាស្រ្ទីប (Gaza Strip) បានធ្វើការលួចជ្រៀតចូល ដែលមិនធ្លាប់មានពីមុនមកកាលពីថ្ងៃសៅរ៍ ទៅក្នុងភាគខាងត្បូងប្រទេសអ៊ីស្រាអែល ហើយបានបាញ់រ៉ុក្កែតរាប់ពាន់គ្រាប់ចូលទៅក្នុងប្រទេស ខណៈដែលពួកសកម្មប្រយុទ្ធហាម៉ាស់ ដែលកំពុងកាន់អំណាច បានប្រកាសពីការចាប់ផ្តើមប្រតិបត្តិការថ្មីមួយ។

អ៊ីស្រាអែល បានចាប់ផ្តើមវាយលុកលើគោលដៅនានា នៅតំបន់ហ្គាហ្សាជាការឆ្លើយតប ដោយកំណត់ដំណាក់កាលសម្រាប់អ្វីដែលទំនងជាការប្រយុទ្ធគ្នាដ៏ធ្ងន់ធ្ងរថ្មីមួយរវាងសត្រូវដ៏ជូរចត់នេះ។

វីដេអូដែលបានបង្ហោះនៅលើប្រព័ន្ធផ្សព្វផ្សាយសង្គម បានបង្ហាញពីអ្វីដែលមើលទៅដូចជាខ្មាន់កាំភ្លើងប៉ាឡេស្ទីនគ្មានឯកសណ្ឋាន នៅក្នុងទីក្រុងស្តេរ៉ូត( Sderot) ព្រំដែនអ៊ីស្រាអែល។ វីដេអូមួយពីតំបន់ហ្គាហ្សាបានបង្ហាញពីអ្វីដែលមើលទៅដូចជាសាកសពទាហានអ៊ីស្រាអែល ដែលត្រូវបានជាន់ឈ្លីដោយហ្វូងមនុស្សដែលខឹងសម្បា ដោយស្រែកថា «ព្រះជាម្ចាស់ដ៏អស្ចារ្យ»។

វីដេអូមួយទៀត បានបង្ហាញថា ពួកសកម្មប្រយុទ្ធប៉ាឡេស្ទីន បានអូសទាហានអ៊ីស្រាអែលម្នាក់ ដែលកំពុងនៅលើម៉ូតូ។ វីដេអូផ្សេងទៀត បានបង្ហាញពីហ្វូងបុរសប៉ាឡេស្ទីនរាំជុំវិញ និងនៅលើរថក្រោះអ៊ីស្រាអែលដែលកំពុងឆេះ។ ភាពត្រឹមត្រូវនៃវីដេអូ មិនអាចត្រូវបានផ្ទៀងផ្ទាត់ភ្លាមៗនោះទេ។

លោក Mohammed Deif មេដឹកនាំដែលមិនសូវចេញមុខចេញមាត់របស់ក្រុមយោធានៃក្រុមហាម៉ាស់ បានប្រកាសពីការចាប់ផ្តើមនៃអ្វីដែលលោកហៅថា «ប្រតិបត្តិការព្យុះ Al-Aqsa»។