ប្រធានាធិបតីសហរដ្ឋអាមេរិក លោក Joe Biden បានសន្យាគាំទ្ររឹងមំាដូចថ្មដល់អ៊ីស្រាអែល ដើម្បី​ប្រឈមនឹងអ្វីដែលលោកចាត់ទុកថាជាការវាយប្រហារភេរវកម្ម ដោយក្រុម​ជីវពល​ហាម៉ាស់​របស់​ប៉ាឡេស្ទីន ក្នុងនោះការប្រកាសជំនួយយោធាសហរដ្ឋអាមេរិក ត្រូវបាន​គេ​រំពឹង​ទុក​ថា​នឹង​ជិត​កើត​មាន​។

មន្រ្តីរដ្ឋបាលជាន់ខ្ពស់មួយរូបរបស់សហរដ្ឋអាមេរិក បាននិយាយថា កិច្ចពិភាក្សា​កម្រិត​ខ្ពស់​រវាង​ក្រុម​មន្រ្តី​សហរដ្ឋអាមេរិក និងក្រុមមន្រ្តីអ៊ីស្រាអែលលើជំនួយយោធា បានធ្វើរួចរាល់ ក្នុង​នោះ​សេចក្តី​ប្រកាស​របស់ទីក្រុងវ៉ាស៊ីងតោន នឹងត្រូវធ្វើឡើងនៅថ្ងៃអាទិត្យនេះ ។

លោក Biden បានចាត់ទុកការ​វាយ​ប្រហារ​មួយ​នេះ​ថា​ជា​សោកនាដ​កម្ម​ដ៏​អាក្រក់​បំផុត​មក​លើ​មនុស្ស ​ហើយលោកនិយាយថា លោកបាននិយាយជាមួយនាយករដ្ឋមន្រ្តីអ៊ីស្រាអែល លោក Benjamin Netanyahu ដើម្បីបញ្ជាក់ពីការគាំទ្ររបស់លោក ។

លោក Biden បាននិយាយនៅក្នុងសុន្ទរកថាតាមកញ្ចក់ទូរទស្សន៍ពីសេតវិមានថា ខ្ញុំបាន​និយាយ​ប្រាប់​គាត់​ថា សហរដ្ឋអាមេរិកនឹងឈរខាងប្រជាពលរដ្ឋអ៊ីស្រាអែល ដើម្បីប្រឈម​នឹង​ការ​វាយ​ប្រហារ​ភេរវកម្មទាំងអស់នេះ ។  លោកបន្តថា នៅក្នុងរដ្ឋបាលរបស់លោក ការគាំទ្រសន្តិសុខអ៊ីស្រាអែល គឺរឹងមាំដូចថ្ម ហើយ​និង​ឥត​ងាករេ ។

លោកនិយាយទៀតថា ពួកយើងប្រាកដខ្លាំងណាស់ថា ពួកគេត្រូវ​ការ​ជំនួយ​ដែល​ពលរដ្ឋ​របស់​ពួក​គេ​ត្រូវ​ការ ហើយពួកគេអាចបន្តការពារខ្លួនពួកគេបាន ។

ដោយឡែក រដ្ឋមន្រ្តីក្រសួងការបារជាតិសហរដ្ឋអាមេរិកលោក Lloyd Austin បានបញ្ជាក់​ឡើង​វិញ​ពី​ការ​ប្តេជ្ញាចិត្តរបស់ទីក្រុងវ៉ាស៊ីងតោន ដោយលោកនិយាយថា ក្នុងរយៈពេល​ប៉ុន្មាន​ថ្ងៃ​ទៀត​នេះ ​ក្រសួងការពារជាតិ នឹងធ្វើការដើម្បីធានាថា អ៊ីស្រាអែល មានអ្វីដែលពួកគេត្រូវការ ៕