កំពង់ឆ្នាំង៖ នៅថ្ងៃទី០៨ ខែតុលា ឆ្នាំ២០២៣នេះ ឯកឧត្តមបណ្ឌិតសភាចារ្យ អ៊ុក រ៉ាប៊ុន ប្រធាន​ក្រុម​ការងារ​ថ្នាក់កណ្តាលគណបក្សប្រជាជនកម្ពុជាចុះមូលដ្ឋានខេត្តកំពង់ឆ្នាំង រួមនិងក្រុមការងារ អាជ្ញាធរខេត្ត ស្រុក ឃុំ ភូមិ ប្រជាពលរដ្ឋ បានចូលរួមក្នុងពិធីកាន់បិណ្ឌទី០៩ នៅក្នុងវត្តវិហារហ្លួង ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង។

ក្នុង​ឱកាសជួបជាមួយប្រជាពលរដ្ឋនៅព្រឹកនេះ ឯកឧត្តមបណ្ឌិតសភាចារ្យ ក៏បាន​មាន​ប្រសាសន៍​ទៅ​កាន់​បងប្អូនប្រជាពលរដ្ឋដោយរំលឹក និងបង្ហាញ​ជូន​ដល់​ប្រជាពលរដ្ឋ​អំពី​សមិទ្ធផល​នានា​ជា​ច្រើន​ដែល​រាជរដ្ឋាភិបាលអាណត្តិទី៧ដឹកនាំដោយសម្តេចមហាបវរធិបតី ហ៊ុន ម៉ាណែត នាយក​រដ្ឋ​មន្ត្រី​ បាននិងកំពុងកសាងអភិវឌ្ឍ ក្នុងនោះមានទាំងមន្ទីរពេទ្យ, មណ្ឌលសុខភាព, សាលា​រៀន​ចាប់​ពី​ថ្នាក់​មតេយ្យ ដល់ថ្នាក់ឧត្តមសិក្សា, វត្តអារាមជាដើម,។ល។ ពិសេស​ផ្នែក​ហេដ្ឋា​រចនា​សម្ព័ន្ធ​ផ្លូវ​ថ្នល់​ ដែលក្នុងនាមឯកឧត្តមជារដ្ឋមន្ត្រីក្រសួងអភិវឌ្ឍន៍ជនបទ គឺឯកឧត្តម​បាន​កសាង​សមិទ្ធ​ផល​ជា​ច្រើន​នៅទូទាំងប្រទេស តាំងពីខេត្តក្រុងរហូតដល់មូលដ្ឋានទីជនបទផងដែរ។

ឯកឧត្តមបណ្ឌិតសភាចារ្យបានបន្តថា៖ ការរីកចម្រើនលើគ្រប់វិស័យនាពេលបច្ចុប្បន្ននេះ បង​ប្អូន​ប្រជា​ពលរដ្ឋបានឃើញច្បាស់ផ្ទាល់នឹងភ្នែកហើយ ទាំងការរស់នៅប្រកបដោយសុខសន្តិភាព ទាំង​ការ​រីក​ចម្រើនចំពោះសមិទ្ធផលនានា ទាំង​អស់​នេះ​ក៏​ដោយ​សារ​ក្រោម​ការ​ដឹកនាំ​ប្រកប​ដោយភាព​ឈ្លាសវៃរបស់សម្ដេចតេជោ ហ៊ុន សែន អតីតនាយករដ្ឋមន្ត្រី និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនាពេលបច្ចុប្បន្ន ដែលសម្តេចទាំងពីរបានខិតខំលះបង់គ្រប់បែបយ៉ាង ដើម្បី​ជាតិមាតុភូមិ តាំងពីការរំដោះប្រទេសពីបនប្រល័យពូជសាសន៍ ប៉ុល ពត ហើយ​បង្កើត​ឱ្យ​មាន​សុខ​សន្តិភាព និងធ្វើ​ការ​អភិវឌ្ឍ​ប្រទេស​ជាតិ​ឱ្យ​មាន​ភាព​សម្បូរ​សប្បាយ​មក​ដល់​ពេល​បច្ចុប្បន្ន​នេះ មិនតែប៉ុណ្ណោះ គណបក្សប្រជាជនកម្ពុជា ដែលមានសម្ដេចតេជោ ហ៊ុន សែន ជា​ប្រធាន នឹងបន្តការពារសុខសន្តិភាព នឹងធ្វើ​ការ​អភិវឌ្ឍ​ប្រទេស​ជាតិ​ឱ្យ​រឹត​តែមា​ន​ភាព​សម្បូរ​សប្បាយ​ជា​បន្តទៀត៕ កាំង ហុងវាស្នា