ឯកឧត្ដម ម៉ា ឈឿន តំណាងរាស្រ្តមណ្ឌលខេត្តកំពង់ចាម និងលោកជំទាវកិត្តិបណ្ឌិត អ៊ុក  ម៉ាលី ព្រមទាំងក្រុមគ្រួសារ សហការី និងមន្ត្រីរាជការនៅព្រឹកថ្ងៃទី៨ ខែតុលា​ ឆ្នាំ​២០២៣នេះ​ បាន​អញ្ជើញចូលរួម​ពិធីកាន់បិណ្ឌ ទី៩ នៅ​សាលា​បុណ្យ​ភូមិ​ជើង​ឆ្នុក​ ឃុំតាំង​ក្រាំង​ ស្រុក​បាធាយ​ខេត្ដកំពង់ចាម។

ក្នុងឱកាសដឹកនាំកាន់បិណ្ឌ ទី៩នោះ ឯកឧត្ដម ម៉ា ឈឿន បាន​លើក​ឡើង​ថា​ បុណ្យ​កាន់​បិណ្ឌ​ និង​ភ្ជុំ​បិណ្ឌ​ជា​ពិធី​បុណ្យសាសនាធំប្រចាំឆ្នាំ ដែលមានរយៈពេល១៥ថ្ងៃ គឺចាប់ពីថ្ងៃ១រោច ដល់​ថ្ងៃ​១៥​រោច​ ខែភទ្របទ។ បុណ្យភ្ជុំបិណ្ឌជាពិធីបុណ្យមួយដែលធំជាងគេ នៅក្នុង​ចំណោម​ពិធី​បុណ្យ​ទាំង​អស់​ ចំពោះអ្នកកាន់ព្រះពុទ្ធសាសនា។

ឯកឧត្តមបានបន្តទៀតថា ជារៀងរាល់ឆ្នាំនៅពេលដល់ថ្ងៃខែ ដែលត្រូវប្រារព្ធ ពិធីបុណ្យភ្ជុំបិណ្ឌ គ្រប់​បងប្អូនកូនចៅ សាច់ញាតិសន្ដានទាំងអស់ ទោះនៅទីជិត ឬទីឆ្ងាយ តែងតែ​ធ្វើ​ដំណើរ​ទៅ​ជួប​ជុំ​គ្នា ​ជាពិសេសឪពុកម្ដាយនៅស្រុកកំណើត ដើម្បីរៀបចំម្ហូបអាហារ បាយសម្ល ចង្ហាន់​យក​ទៅ​ប្រគេន​ព្រះសង្ឃ ដែលគង់នៅវត្តអារាម។ ទាំងនេះគឺជាទម្លាប់មួយដែលគេនិយមធ្វើតៗគ្នា របស់​ជន​ជាតិ​ខ្មែរ​ជាយូរមកហើយ។

យ៉ាងណាក៏ដោយឯកឧត្តមតំណាងរាស្រ្ត បានបញ្ជាក់ផងដែរថា ការ​ដែល​យើង​មាន​ឱកាស​ជួប​ជុំ​គ្នា​ធ្វើ​បុណ្យ ជាពិសេសបុណ្យកាន់បិណ្ឌនាពេលនេះ គឺដោយសារប្រទេសមានសុខសន្តិភាព និង​ការ​អភិវឌ្ឍផងដែរ៕ អត្ថបទ៖ បាន ចក់