ខណៈពេលអ៊ីស្រាអែល រងការវាយប្រហារដ៏សាហាវដោយក្រុមសកម្មប្រយុទ្ធហាម៉ាស់ ដែល​បាន​បើក​ការ​វាយប្រហារជុំវិញតំបន់ហ្កាហ្សា និងបន្តវាយសម្រុកទៅមុខ ព្រមទាំង​បាន​សម្លាប់​ជន​ស៊ីវិល​ជា​ច្រើន​នាក់ នៅក្នុងទីប្រជុំជនអ៊ីស្រាអែលនោះ ប្រមុខក្រសួងការពារជាតិ បានប្រឈម​មុខ​នឹង​សំណួរ​កាន់​តែ​ច្រើន​ឡើង អំពីថាហេតុអ្វីបានជាគ្រោះមហន្តរាយនេះអាចកើតឡើងបាន ដោយ​នោះ​បង្ហាញ​ពីចន្លោះប្រហោង នៃព័ត៌មានចារកម្មសម្ងាត់របស់អ៊ីស្រាអែល។

រយៈពេលមួយថ្ងៃបន្ទាប់ពីខួបលើកទី៥០ នៃការចាប់ផ្តើមនៃសង្រ្គាម Yom Kippur ឆ្នាំ១៩៧៣​មក នៅពេលដែលកងកម្លាំងអ៊ីស្រាអែលត្រូវបានរងការវាយប្រហារដោយមិនបានត្រៀមខ្លួន ដោយ​កងរថក្រោះស៊ីរី និងអេហ្ស៊ីប យោធាអ៊ីស្រាអែលមួយនេះបានជួបប្រទះជាថ្មីម្តងទៀត នូវ​ការ​វាយ​ប្រហារភ្លាមៗដ៏គួរឲ្យភ្ញាក់ផ្អើល។

អ្នកនាំពាក្យកងទ័ពអ៊ីស្រាអែលបាននិយាយថា ប្រទេសនេះ​នឹង​មាន​ការ​ពិភាក្សា​លើ​ការ​រៀបចំ​ស៊ើបការណ៍​ចារកម្មស្ងាត់ «ក្នុងពេលខាងមុខ» ប៉ុន្តែសម្រាប់ពេលនេះ ការផ្តោត​សំខាន់​គឺ​ទៅ​លើការ​ប្រយុទ្ធ។

គួររម្លឹកផងដែរថា អ៊ីស្រាអែលតែងតែចាត់ទុកក្រុមហាម៉ាស់ ថាជាសត្រូវស៊ូពូជរបស់ខ្លួន ប៉ុន្តែ​ចាប់​តាំង​ពី​ការខូចខាតយ៉ាងធ្ងន់ធ្ងរលើតំបន់ហ្កាហ្សា ក្នុងសង្គ្រាមរយៈពេល ១០ថ្ងៃកាលពីឆ្នាំ ២០២១​មក អ៊ីស្រាអែលបានសម្របខ្លួននឹងការគំរាមកំហែង ព្រម​ទាំង​ត្រៀម​ខ្លួន​ ដើម្បី​រក្សា​ស្ថិរភាព​នៅ​ក្នុង​តំបន់​ហ៊ុមព័ន្ធ​មួយនេះផងដែរ៕