ក្រសួងការពារជាតិទួរគី បាននិយាយកាលពីថ្ងៃសៅរ៍ (៧ តុលា) ថា កង​កម្លាំង​ទួរគី​បាន​សម្លាប់​ពួក​សកម្ម​ប្រយុទ្ធឃឺដ ចំនួន៥៨នាក់ នៅភាគខាងជើងប្រទេសស៊ីរី ក្នុង​ការ​វាយ​ប្រហារ​ពេញ​មួយ​យប់​លើ​គោល​ដៅ​ជាច្រើនរបស់ក្រុមសកម្មប្រយុទ្ធ ខណៈជម្លោះនៅ​ក្នុង​តំបន់​បាន​កើន​ឡើង​ជិត​មួយ​សប្តាហ៍ បន្ទាប់ពីការវាយប្រហារដោយគ្រាប់បែកនៅទីក្រុងអង់ការ៉ា។

ប្រទេសទួរគីក្នុងសប្តាហ៍នេះបាននិយាយថា គោលដៅ​ទាំងអស់​ដែល​ជា​កម្ម​សិទ្ធិ​របស់​កង​ជីវពលខុ​​សច្បាប់នៃគណបក្សពលកម្មឃើឌីស្ថាន (PKK) និងកងជីវពលឃឺដ YPG របស់ស៊ីរី គឺជា «គោលដៅវាយប្រហារស្របច្បាប់» សម្រាប់កងកម្លាំងរបស់ខ្លួន បន្ទាប់ពីគណបក្ស PKK បាន​អះអាងទទួលខុសត្រូវចំពោះការទម្លាក់គ្រាប់បែកកាលពីថ្ងៃអាទិត្យ នៅទីក្រុងអង់ការ៉ា ដែល​បាន​ធ្វើ​ឱ្យមន្ត្រីនគរបាលពីរនាក់រងរបួស និងបានបណ្ដាលឲ្យអ្នកវាយប្រហារពីរនាក់ស្លាប់។

ចាប់តាំងពីការវាយប្រហារដោយគ្រាប់បែកមក ទីក្រុង​អង់​ការ៉ា​បាន​បើក​ការ​វាយ​ប្រហារ​តាម​អាកាស និងការវាយប្រហារលើដី ប្រឆាំងនឹង​គោល​ដៅ​ក្រុម​សកម្ម​ប្រយុទ្ធ​នៅ​ភាគ​ខាង​ជើង​ប្រទេស​ស៊ីរី និងអ៊ីរ៉ាក់ ខណៈពេលដែលបង្កើនប្រតិបត្តិការសន្តិសុខនៅក្នុងប្រទេស។

ក្រសួង​បានបន្ថែមថា ប្រតិបត្តិការដែលធ្វើឡើងក្រោមសិទ្ធិការពារខ្លួន បានផ្ដល់ភាព «អព្យាក្រឹត» ដល់​ក្រុមសកម្មប្រយុទ្ធចំនួន៥៨នាក់ នៅក្នុងតំបន់។ ជាធម្មតា ទីក្រុងអង់ការ៉ា ប្រើពាក្យ «អព្យាក្រឹត» ក្នុងន័យថា «សម្លាប់»៕