ឯកឧត្តម ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ព្រមទាំងក្រុមគ្រួសារ សហការី និងមន្ត្រីក្រោមឱវាទមួយចំនួនទៀត នៅព្រឹកថ្ងៃទី៨ ខែតុលា ឆ្នាំ២០២៣នេះ​បាន​ចូល​រួម​​ពិធី​​កាន់បិណ្ឌ វេនទី៩ នៅវត្តបទុមវតី រាជធានីភ្នំពេញ។

ការចូលរួមកាន់បិណ្ឌនេះ គឺធ្វើឡើងតាមទំនៀមទម្លាប់ប្រពៃណីព្រះពុទ្ធសាសនា ហើយក៏ដើម្បីផ្គត់ ផ្គង់​ព្រះសង្ឈគង់ចាំព្រះវស្សា និងប្រមែប្រមូលផល្លានិសង្ឈ ដែល​កើត​ចេញ​ពី​សទ្ធា​ចិត្ត​ជ្រះថ្លា​លើក​ឧទ្ទិស ជូនដល់ញាតិបុព្វការីជនមាន មាតាបិតា ញាតិការទាំងប្រាំពីរសន្តាន ដែល​បាន​ចែក​ឋាន​ទៅ​កាន់​បរលោកនាយជាដើម។

ក្រៅពីរាប់បាត ប្រគេនចង្ហាន់ដល់ព្រះសង្ឈ ឯកឧត្តម ទៀ សីហា និងលោកជំទាវ រួមទាំងមន្រ្តី ក៏​បាន​នាំ​បច្ច័យមួយចំនួនប្រគេនដល់ព្រះសង្ឈ ដើម្បីកសាងនូវសមិទ្ធផលនានា ក្នុងវត្ត​ជា​កិច្ច​ទ្រទ្រង់​ព្រះពុទ្ធ​សាសនាឲ្យបានឋិតថេរចីរកាលគ្រប់៥០០០ព្រះវស្សាផងដែរ។

សូមបញ្ជាក់ថាបុណ្យកាន់បិណ្ឌនិងភ្ជុំបិណ្ឌជាពិធីបុណ្យសាសនាធំប្រចាំឆ្នាំ ដែល​មាន​រយៈ​ពេល​១៥​ថ្ងៃ ​គឺចាប់ពីថ្ងៃ១រោច ដល់ថ្ងៃ១៥រោច ខែភទ្របទ។ បុណ្យ​ភ្ជុំ​បិណ្ឌ​ជា​ពិធី​បុណ្យ​មួយ​ដែល​ធំ​ជាង​គេ​ នៅក្នុងចំណោមពិធីបុណ្យទាំងអស់ ចំពោះអ្នកកាន់ព្រះពុទ្ធសាសនា។ ជារៀង​រាល់​ឆ្នាំ​នៅ​ពេល​ដល់​ថ្ងៃខែ ដែលត្រូវប្រារព្ធ ពិធីបុណ្យភ្ជុំបិណ្ឌ គ្រប់បងប្អូនកូនចៅ សាច់ញាតិសន្ដានទាំងអស់ ​ទោះ​នៅទីជិត ឬទីឆ្ងាយ តែងតែធ្វើដំណើរទៅជួបជុំគ្នា ជាពិសេសឪពុកម្ដាយនៅស្រុកកំណើត ដើម្បី​រៀបចំម្ហូបអាហារ បាយសម្ល ចង្ហាន់យកទៅប្រគេនព្រះសង្ឃ ដែលគង់នៅវត្តអារាម។ ទាំង​នេះ​គឺជាទម្លាប់មួយដែលគេនិយមធ្វើតៗគ្នា របស់ជនជាតិខ្មែរជាយូរមកហើយ។

យ៉ាង​ណា​ក៏ដោយការដែលយើងមានឱកាសជួបជុំគ្នាធ្វើបុណ្យ ជាពិសេស​បុណ្យ​កាន់​បិណ្ឌ​នា​ពេល​នេះ​ គឺដោយសារប្រទេសមានសុខសន្តិភាព និងការអភិវឌ្ឍផងដែរ៕ អត្ថបទ៖ បាន ចក់