ជម្លោះប៉ាឡេស្ទីន និងអ៊ីស្រាអែល បានផ្ទុះឡើងជាថ្មី បន្ទាប់ពីមាន​ការ​វាយ​ប្រហារ​ដ៏​ភ្ញាក់​ផ្អើល​មួយដោយចលនាប្រដាប់អាវុធប៉ាឡេស្ទីន មានមូលដ្ឋាននៅតំបន់ហ្គាហ្សា របស់ក្រុមហាម៉ាស លើអ៊ីស្រាអែលកាលពីថ្ងៃសៅរ៍ (៧ តុលា)។ ជាការឆ្លើយតប អ៊ីស្រាអែល​បាន​បើក​ការ​វាយ​ប្រហារ​លើ​តំបន់​ហ្កាហ្សាវិញ ហើយអំពើហិង្សាថ្មីនេះ បានបណ្តាល​ឱ្យ​មនុស្ស​យ៉ាង​ហោច​ណាស់​ ៥០០​នាក់​ស្លាប់​ពី​ភាគីទាំងសងខាង។

ការ​ប្រឈមមុខដាក់គ្នា ដែលជាការផ្ទុះអាវុធទ្រង់ទ្រាយធំបំផុតវាងភាគីទាំងពីរ ចាប់តាំង​ពី​ខែ​ឧសភា​ ឆ្នាំ២០២១មកនេះ បាន​ធ្វើ​ឱ្យ​មាន​ការ​ព្រួយ​បារម្ភ​ពី​បណ្ដា​ប្រទេស​ផ្សេង​ៗ​ជុំវិញ​ពិភព​លោក​ រួមទាំងប្រទេសចិនផងដែរ ដែលបានជំរុញឱ្យភាគីពាក់ព័ន្ធទាំងអស់រក្សា «ភាពស្ងប់ស្ងាត់»​។

យោងតាមក្រុមអ្នកជំនាញបានឱ្យដឹងថា ហេតុផលនៅពីក្រោយការកើតមាន​ឡើងវិញ នៃ​ការប៉ះទង្គិចគ្នា​ដ៏យូរ នៅក្នុងតំបន់មជ្ឈិមបូព៌ានេះ គឺស្ថិតនៅក្នុងបញ្ហា​ដែល​បន្សល់​ទុក​ពី​ប្រវត្តិ​សាស្ត្រ និងដោយសារស្ថានភាពផ្លាស់ប្តូរថ្មីៗនៅក្នុងតំបន់។

ការ​វាយ​ប្រហារដោយក្រុមហាម៉ាសនេះ កើតឡើងបន្ទាប់​ពី​មាន​ការ​ប្រយុទ្ធ​គ្នា​យ៉ាង​ខ្លាំង​ក្លាមួ​យ​នៅតំ​​បន់ West Bank ជាមួយនឹងការវាយឆ្មក់របស់អ៊ីស្រាអែល ការវាយ​ប្រហារ​តាម​ដង​ផ្លូវ​របស់​ប៉ា​ឡេស្ទីន និងការវាយលុកផ្សេងទៀត ពីសំណាក់អ្នកតាំងលំនៅជនជាតិជ្វីហ្វ លើភូមិ​របស់​ជនជាតិ​ប៉ាឡេស្ទីន។

ក្រុម​ហាម៉ាសបាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ថា ការវាយលុកនេះ គឺជា​ការ​ឆ្លើយ​តបទៅនឹងការប្រមាថមើលងាយវិហារអ៊ីស្លាម Al-Aqsa និងការ​កើន​ឡើង​នៃ​អំពើ​ហិង្សា​សម្រាប់​អ្នក​តាំងលំនៅ។ សូបបញ្ជាក់ថា លក្ខខណ្ឌរស់នៅសម្រាប់ជនជាតិប៉ាឡេស្ទីន កាន់តែ​អាក្រក់​ឡើង​ក្រោមរដ្ឋាភិបាលស្តាំនិយមរបស់ប្រធានាធិបតីអ៊ីស្រាអែល លោក Benjamin Netanyahu​៕