ស្វាយរៀង៖ អភិបាលខេត្តស្វាយរៀង ឯកឧត្តម ប៉េង ពោធិ៍សា នៅព្រឹកថ្ងៃទី៩ ខែតុលា ឆ្នាំ ២០២៣​នេះ បានណែនាំដល់អភិបាលក្រុងស្រុកទាំង៨ ចាត់​វិធានការ​ទប់​ស្កាត់​ការ​ឆ្លង​រាល​ដាល​ជំងឺ​ផ្តាសាយបក្សី។

លិខិតរបស់រដ្ឋបាលខេត្តស្វាយរៀងបញ្ជាក់ថា យោងសេចក្តីប្រកាសព័ត៌មាន ចុះថ្ងៃទី០៨ ខែតុលា ឆ្នាំ២០២៣ របស់ក្រសួងសុខាភិបាល ឯកឧត្តមអភិបាលខេត្តស្វាយរៀង បាន​ណែនាំ​ដល់​អភិបាល​ក្រុង ស្រុកទាំងអស់ថា មានអ្នកជំងឺផ្តាសាយបក្សី ចំនួន ០១ករណី នៅភូមិម្រាក់ទាប ឃុំត្រស់ ស្រុករមាសហែក ខេត្តស្វាយរៀង ត្រូវបានបញ្ជាក់ថា វិជ្ជមានវីរុសផ្តាសាយបក្សី ប្រភេទ ហាស់​៥ អ៊ិន១ (H5N1) ពីវិទ្យាស្ថានជាតិសុខភាពសាធារណៈ កាលពីថ្ងៃទី០៧ ខែតុលា ឆ្នាំ​២០២៣ និងបានបណ្តាលឱ្យបាត់បង់អាយុជីវិត។

ដើម្បី​ចូលរួមទប់ស្កាត់ កុំឱ្យមានការឆ្លងរាលដាលជំងឺផ្តាសាយ បក្សី នៅក្នុងសហគមន៍ ឯកឧត្តម​អភិបាល​ខេត្ត​បានណែនាំដល់អភិបាលក្រុង ស្រុក ត្រូវចាត់វិធានការចុះអប់រំណែនាំប្រជាពលរដ្ឋ ឱ្យ​ចេះ​ធ្វើអនាម័យលំនៅឋាន លាង ដៃឱ្យញឹកញាប់ជាមួយសាប៊ូ និងទឹក មុនពេលបរិភោគ និង​បន្ទាប់​ប៉ះពាល់ជាមួយ បក្សី ដាក់កុមារឱ្យនៅឆ្ងាយពីសត្វបក្សី និងដាក់​សត្វ​បក្សី​នៅ​ឱ្យ​ឆ្ងាយ​ពី​កន្លែង​រស់នៅ កុំបរិភោគសត្វបក្សីឈឺ ឬងាប់ និងរាល់សត្វបក្សីដែលធ្វើសម្រាប់បរិភោគ ត្រូវ ចម្អិន​ឱ្យបានឆ្អិនល្អ ។ ត្រូវណែនាំដល់ប្រជាពលរដ្ឋ ក្នុងករណីប្រទះឃើញមានសត្វបក្សីឈឺ ឬងាប់ក្នុង ចំនួន​ច្រើន ឱ្យរាយកាណ៍មកអាជ្ញាធរមានសមត្ថកិច្ច និងហាមដាច់ខាតការយក សត្វបក្សីឈឺ ឬ​ងាប់ ទៅធ្វើចម្អិនធ្វើម្ហូបអាហារ៕