ភ្នំពេញ ៖ អភិបាលខណ្ឌច្បារអំពៅ លោកចេង មុនីរ៉ា បានធ្វើការណែនាំ និងក្រើនរំលឹកជាថ្មីម្តង ​ហើយ​ម្តងទៀត ដល់កម្លាំងសន្តិសុខសណ្តាប់ធ្នាប់ខណ្ឌទាំងអស់ ត្រូវបន្តការរក្សាបាន​នូវសាមគ្គីភាពរវាងគ្នា និងគ្នាឱ្យបានល្អ និងបញ្ចៀសឱ្យខាងតែបាននូវរាល់ សកម្មភាព​អសីលធម៌ទាំងឡាយទៅលើពលរដ្ឋ កំឡុងពេលចុះបំពេញការងារបស់ខ្លួន ដូចជា​ការប្រើ​អាកប្បកិរិយា​ច្រងេងច្រងាង​ ឬពាក្យសំដីមិនសមរម្យជាដើម ។

ថ្លែងបែបនេះ ក្នុងគ្រាលោក ចេង មុនីរ៉ា ជួបសំណេះសំណាល និងឧបត្ថម្ភ​អង្កររួមទាំងថវិកា ដល់កម្លាំងសណ្តាប់ធ្នាប់ខណ្ឌជាង ៥០នាក់​ នាព្រឹកថ្ងៃទី០៩ ខែតុលា ឆ្នាំ២០២៣នេះ នៅបរិវេណសាលាខណ្ឌច្បារអំពៅ ។

លោកអភិបាលខណ្ឌ បានហាមប្រាមដាច់ខាតដល់កម្លាំងសន្តិសុខសណ្តាប់ធ្នាប់ គឺ កុំនាំគ្នាលេង​ល្បែងស៊ីសងគ្រប់ប្រភេទ និងកុំសេពគ្រឿងញៀន បើមាន​បុគ្គលណាម្នាក់​លួច​ប្រព្រឹត្តិអំពើ​អបាយ​មុខ​ទាំងអស់នេះ ​ខុសផ្ទុយពីវិន័យកងកម្លាំងសន្តិសុខ​ គឺ​នឹងត្រូវបញ្ឈប់ពីការងារ តែម្តង ។

ជាមួយគ្នានេះដែរលោកអភិបាលខណ្ឌ បានកោតសសើរដល់កម្លាំងសណ្តាប់ធ្នាប់ខណ្ឌទាំងអស់ កន្លងមកបានខិតខំបំពេញការងារយ៉ាង​សកម្មក្នុងការការពារសន្តិសុខ​ ចុះរៀបចំសណ្តាប់ធ្នាប់ សម្រួល​ចរាចរលើដងផ្លូវ ​ ចុះពង្រឹងច្បាប់ចរាចរ​ ចូលរួមត្រួតពិនិត្យអាវុធជាតិផ្ទុះ និងចុះល្បាតតាមមូលដ្ឋាន ។

ដើម្បីអបអសាទរពិធីបុណ្យភ្ជុំបិណ្ឌខាងមុខនេះដែរ ​លោកអភិបាលខណ្ឌបានឧបត្ថម្ភ ដល់​កម្លាំងសណ្តាប់ខណ្ឌក្នុងម្នាក់ៗ​ទទួល បានថវិកា១០ម៉ឺនរៀល ​អង្ករ៣៥ ​គីឡូក្រាម និង​ភេសជ្ជៈ០១កេស ៕ លីហេង