អាហ្វហ្គានីស្ថាន ៖ អង្គការជំនួយសង្រ្គោះកុមារ បាននិយាយកាលពីថ្ងៃអាទិត្យថា កុមារងាយរងគ្រោះខ្លាំង ហើយត្រូវការទីជម្រក ចំណីអាហារបន្ទាន់ និងការផ្គត់ផ្គង់ផ្សេងទៀត បន្ទាប់ពីការរញ្ជួយដីសម្លាប់មនុស្សជាង ២ពាន់នាក់ នៅអាហ្វហ្គានីស្ថាន ។ 

 លោក Arshad Malik គឺជាប្រធានអង្គការសង្រ្គោះកុមារនៅអាហ្វហ្គានីស្ថានបាននិយាយប្រាប់ទីភ្នាក់ងារព័ត៌មានរ៉យទ័រតាមកម្មវិធី Zoom ចេញពីរដ្ឋធានីអ៊ីស្លាម៉ាបាដ ប្រទេសប៉ាគីស្ថាន ថា តំបន់រងផលប៉ះពាល់ បានប្រឈមនឹងអសន្តិសុខស្បៀងរួចទៅហើយ មុនការរញ្ជួយដី ។ លោកបានរៀបរាប់ថា ស្ថានភាពស្ថិតក្នុងវិបត្តិជាន់លើវិបត្តិ ។ 

 លោក Malik បន្តថា តំបន់ដែលពួកយើងនិយាយ គឺខេត្ត Herat និងខេត្តជុំវិញនោះ ដែលពួកយើងចាត់ថ្នាក់ថាជាតំបន់កើតមានអសន្តិសុខស្បៀង ។ ពួកគេធ្លាក់ក្នុងដំណាក់កាលទី ៣នៃដំណាក់កាលសន្តិសុខស្បៀងសមាហរណកម្ម ដែលជាតំបន់ដែលកើតមានអសន្តិសុខស្បៀងរួចទៅហើយ ដោយសារស្ថានភាពសេដ្ឋកិច្ច និងគ្រោះរាំងស្ងួត ។ ដូច្នេះហើយ នេះគឺជាវិបត្តិមួយជាន់លើវិបត្តិមួយទៀត ដែលពួកគេប្រឈមរួចទៅហើយ ហើយក្រុមគ្រួសារត្រូវការការគាំទ្របន្ទាន់នៅពេលឥឡូវនេះ ។ 

 ស្រ្តី និងកុមារ នាំគ្នាអង្គុយ និងសម្រាកនៅលើគំនរបាក់បែក នៅក្រៅផ្ទះរងការបំផ្លិចបំផ្លាញរបស់ពួកគេ ស្របពេលដែលទ្រព្យសម្បត្តិរបស់ពួកគេ ដាក់នៅជិតខ្លួនពួកគេ ស្ថិតក្នុងស្រុក Zinda Jan នៃខេត្ត Herat ។ 

 មន្ទីរស្ទង់ភូគព្ភសាស្រ្តសហរដ្ឋអាមេរិក បាននិយាយថាការរញ្ជួយដីកម្រិត ៦.៣រ៉ិចទ័រ កាលពីថ្ងៃសៅរ៍នៅភាគខាងលិចប្រទេសអាហ្វហ្គានីស្ថាន បានបានកើតមាននៅចម្ងាយ ៣៥គ.ម ភាគពាយ័ព្យទីក្រុង Herat ៕