ភ្នំពេញ៖ នៅថ្ងៃទី៩ ខែតុលា ឆ្នាំ ២០២៣ ឯកឧត្តម សុខ ចិន្តាសោភា ឧបនាយករដ្ឋមន្ត្រី និងរដ្ឋមន្ត្រីការបរទេស និងសហប្រតិបត្តិការអន្តរជាតិ បានអនុញ្ញាតជូនឯកឧត្តម Nguyen Huy Tang ឯកអគ្គរដ្ឋទូតនៃសាធារណរដ្ឋសង្គមនិយមវៀតណាម ប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ នៅទីស្តីការក្រសួង ។

ក្នុងជំនួបនេះ ភាគីទាំងពីរ បានវាយតម្លៃខ្ពស់ ចំពោះទំនាក់ទំនងទ្វេភាគីដ៏យូរអង្វែងរវាងកម្ពុជា និងវៀតណាម ដែលបានលូតលាស់ឥតឈប់ឈរលើគ្រប់កម្រិត ដោយឈរលើស្មារតីភាពជាអ្នកជិតខាងល្អ មិត្តភាពជាប្រពៃណី ព្រមទាំងកិច្ចសហប្រតិបតិ្តការយូរអង្វែងនិងគ្រប់ជ្រុងជ្រោយ ។ ភាគីទាំងពីរក៏បានគូសបញ្ជាក់ពីសារៈសំខាន់នៃការជំរុញបន្ថែមទៀតនូវកិច្ចសហប្រតិបត្តិការកាន់តែស៊ីជម្រៅលើវិស័យនានាដែលជាផលប្រយោជន៍រួម ។

ក្នុងឱកាសនោះ ឯកឧត្តម សុខ ចិន្តា សោភា សម្រាប់ជំនួបជាមួយអគ្គរដ្ឋទូត នៃប្រទេសជាប់ព្រំដែនកម្ពុជា ដោយទូតវៀតណាមប្រចាំកម្ពុជា គឺជាទូតដំបូង ដែលត្រូវបានអនុញ្ញាតឲ្យចូលរួមសម្ដែងការគួរសម ក្នុងពេលដែលឯកឧត្តម បានទទួលនូវតំណែងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ។

ជាមួយគ្នានោះ ឯកអគ្គរដ្ឋទូតវៀតណាម បាននាំមកនូវការអបអរសាទរ ពីសំណាក់ថ្នាក់ដឹកនាំប្រទេសវៀតណាម ជូនចំពោះឯកឧត្តមឧបនាយករដ្ឋមន្ត្រី ក្នុងមុខដំណែងថ្មីនេះ រួមទាំងការប្ដេជ្ញាបន្តពង្រឹងនូវកិច្ចសហប្រតិបត្តិការ នៃប្រទេសទាំងពីរ ៕ ដោយ ៖ បាន សុខរិទ្ធ