អាមេរិក ៖ សហជីពអាកាសយានិកសម្រាប់ក្រុមហ៊ុនអាកាសចរណ៍អាមេរិក បានណែនាំសមាជិករបស់ខ្លួនឲ្យ បដិសេធការហោះហើរទៅកាន់ប្រទេសអ៊ីស្រាអែល ដោយលើកឡើងពីសង្គ្រាម ដែលកំពុងបន្តរវាងអ៊ីស្រាអែល និងប៉ាឡេស្ទីន នៅតំបន់ហ្គាហ្សា។

ប្រធានសហភាព លោក អែដ ស៊ីជឺ (Ed Sicher) បាននិយាយនៅក្នុងអ៊ីមែលទៅកាន់សមាជិកថា អ្នកបើកយន្តហោះរបស់ក្រុមហ៊ុន មិនគួរហោះហើរទៅកាន់ប្រទេសអ៊ីស្រាអែលឡើយ រហូតទាល់តែពួកគេ «អាចធានាបានដោយសមហេតុផលអំពីសុវត្ថិភាព និងសន្តិសុខក្នុងតំបន់នេះ»។

អ៊ីមែលនេះ បានដកស្រង់ការប្រឹក្សាថ្មីៗបំផុតពីក្រសួងការបរទេសសហរដ្ឋអាមេរិក ដែលព្រមានថា ស្ថានភាពបច្ចុប្បន្ន នៅក្នុងប្រទេសអ៊ីស្រាអែល «នៅតែបន្តមិនអាចទាយទុកជាមុនបាន» ហើយថា ការបាញ់កាំភ្លើងត្បាល់ និងគ្រាប់រ៉ុក្កែត អាចកើតឡើងគ្រប់ពេលវេលា ដោយគ្មានការព្រមាន ដែលធ្វើឲ្យយន្តហោះស្ថិតក្នុងស្ថានភាពគ្រោះថ្នាក់។

លោកស៊ីជឺ បាននិយាយថា៖ «វាមិនមែនជាការប្រុងប្រយ័ត្ន ឬសមស្របទេ ក្នុងការដាក់បុគ្គលិកជើងហោះហើរ និងអ្នកដំណើររបស់យើងដោយចេតនា ឲ្យមានគ្រោះថ្នាក់ដោយកាបន្តជើងហោះហើរចូលទៅក្នុងតំបន់សង្រ្គាមមួយនេះ»។