អ៊ីស្រាអែល ៖ យុទ្ធនាការប្រកបដោយភាពប្រុងប្រយ័ត្ន ដើម្បីគេចចេញពីការចាប់អារម្មណ៍ បានធ្វើឲ្យអ៊ីស្រាអែលស្រឡាំងកាំង នៅពេលដែលក្រុមសកម្មប្រយុទ្ធប៉ាឡេស្ទីនហាម៉ាស បានបើកការវាយប្រហារដ៏មហន្តរាយរបស់ខ្លួន រហូតធ្វើឲ្យកងកម្លាំងដែលប្រើប្រាស់មធ្យោបាយនានា ដូចជាជិះគ្រឿងចក្រឈូសឆាយដី យានសំកាំង (ខ្លែងប្រើគ្រឿងម៉ាស៊ីន) និងម៉ូតូជាដើម អាចប្រយុទ្ធតតាំងជាមួយកងទ័ពដ៏មានឥទ្ធិពលបំផុត នៅមជ្ឈិមបូព៌ា។

ការវាយប្រហារកាលពីថ្ងៃសៅរ៍ (ទី៧ ខែតុលា) ដែលជាការលុកចូលដ៏អាក្រក់បំផុតមួយទៅក្នុងប្រព័ន្ធការពាររបស់អ៊ីស្រាអែល គិតចាប់តាំងពីកងទ័ពអារ៉ាប់ បានធ្វើសង្រ្គាមក្នុងឆ្នាំ១៩៧៣ បានកើតឡើងបន្ទាប់ពីមានយុទ្ធសាស្ត្ររយៈពេល ២ឆ្នាំរបស់ក្រុមហាម៉ាស់ ដែលពាក់ព័ន្ធនឹងការរក្សាផែនការយោធារបស់ខ្លួនជាសម្ងាត់ និងការធ្វើឲ្យអ៊ីស្រាអែលយល់ថា ខ្លួនមិនចង់ឲ្យមានការប្រយុទ្ធគ្នានោះឡើយ។

យោងតាមប្រភព ដែលស្និទ្ធនឹងក្រុមហាម៉ាស់ បានឲ្យដឹងថា ខណៈពេលដែលអ៊ីស្រាអែល ត្រូវបានធ្វើឲ្យជឿថា ខ្លួនកំពុងគ្រប់គ្រងក្រុមហាម៉ាស ដែលធុញទ្រាន់នឹងសង្គ្រាម ដោយការផ្តល់ការជំរុញផ្នែកសេដ្ឋកិច្ចដល់អ្នកធ្វើការនៅតំបន់ហ្គាហ្សានោះ យុទ្ធជនរបស់ក្រុមនេះ កំពុងត្រូវបានបណ្តុះបណ្តាល និងហាត់សមជារឿយៗ នៅក្នុងទិដ្ឋភាពធម្មតា។

ប្រភពនេះបានផ្តល់ព័ត៌មានលម្អិតជាច្រើន សម្រាប់របាយការណ៍នៃការវាយប្រហារនិងការបង្កើតឡើងរបស់ការវាយប្រហារ ដែលត្រូវបានប្រមូលផ្ដុំដោយសារព័ត៌មាន Reuters។ ប្រភពចំនួន៣ នៅក្នុងស្ថាប័នសន្តិសុខរបស់អ៊ីស្រាអែល ដែលមិនខុសពីប្រភពផ្សេងទៀត ដោយសុំនិយាយក្នុងលក្ខខណ្ឌមិនបញ្ចេញឈ្មោះ ក៏បានចូលរួមចំណែកក្នុងការផ្ដល់របាយការណ៍នេះផងដែរ។

ជាមួយគ្នានេះ ប្រភពបានបន្ថែមថា សូម្បីមេដឹកនាំក្រុមហាម៉ាសជាច្រើន ក៏មិនបានដឹងពីផែនការនេះដែរ ហើយខណៈពេលដែលធ្វើការហ្វឹកហ្វឺន យុទ្ធជនចំនួន ១.០០០នាក់ ដែលត្រូវបានដាក់ពង្រាយក្នុងការវាយលុកនោះ មិនបានដឹងពីគោលបំណងពិតប្រាកដនៃការធ្វើបែបនេះនោះទេ។

ឧត្តមសេនីយ៍ចូលនិវត្តន៍ លោក Yaakov Amidror អតីតទីប្រឹក្សាសន្តិសុខជាតិរបស់នាយករដ្ឋមន្ត្រី លោក Benjamin Netanyahu បានប្រាប់អ្នកសារព័ត៌មាន កាលពីថ្ងៃអាទិត្យ (ទី៨ ខែតុលា) ថា ការវាយប្រហារនេះ តំណាងឲ្យ «ការបរាជ័យដ៏ធំធេងនៃប្រព័ន្ធស៊ើបការណ៍សម្ងាត់ និងឧបករណ៍យោធា នៅភាគខាងត្បូង»៕