អាមេរិក ៖ មេដឹកនាំនៃសំឡេងភាគច្រើនរបស់ព្រឹទ្ធសភាអាមេរិក លោក Chuck Schumer កាលពីថ្ងៃចន្ទ បានអំពាវនាវឲ្យ​ប្រទេសចិន គាំទ្រអ៊ីស្រាអែល បន្ទាប់ពីការវាយប្រហារដ៏ខ្លាំងក្លាដោយក្រុមហាម៉ាស ដោយបន្ថែមថា លោកមានការខកចិត្ត ដែលទីក្រុងប៉េកាំង បានមិនបង្ហាញ «ការអាណិតអាសូរ» សម្រាប់ប្រទេសនេះ កាលពីចុងសប្តាហ៍។

យុទ្ធជនមកពីក្រុមអ៊ីស្លាមហាម៉ាស បានសម្លាប់ជនជាតិអ៊ីស្រាអែលយ៉ាងហោចណាស់ ៧០០នាក់ និងចាប់ខ្លួនរាប់សិបនាក់ទៀត ខណៈដែលពួកគេបានវាយប្រហារទីក្រុងនានារបស់អ៊ីស្រាអែល កាលពីថ្ងៃសៅរ៍ចុងសប្ដាហ៍កន្លងមក ដែលជាការលុកលុយដ៏សាហាវបំផុតចូលទៅក្នុងទឹកដីអ៊ីស្រាអែល គិតចាប់តាំងពីមានការវាយប្រហាររបស់អេហ្ស៊ីប និងស៊ីរី នៅក្នុងសង្រ្គាម ដែលមានឈ្មោះថា «Yom Kippur» កាលពី ៥០ឆ្នាំមុន។

ជាការឆ្លើយតប ក្រសួងការបរទេសចិនបានជំរុញឲ្យ «ភាគីពាក់ព័ន្ធ» រក្សាភាពស្ងប់ស្ងាត់ និងបញ្ឈប់ជាបន្ទាន់នូវអរិភាព ដើម្បីការពារជនស៊ីវិល ដោយបន្ថែមថា «មធ្យោបាយជាមូលដ្ឋានចេញពីជម្លោះ គឺនៅក្នុងការអនុវត្តដំណោះស្រាយរដ្ឋ២ និងការបង្កើតរដ្ឋឯករាជ្យប៉ាឡេស្ទីន»។

លោក Schumer កំពុងដឹកនាំគណៈប្រតិភូសភាតំណាងរាស្ត្រមកពីគណបក្សទាំង២ ទៅកាន់តំបន់អាស៊ី ដែលក្នុងនោះរួមបញ្ចូលទាំងការឈប់សំចតនៅកូរ៉េខាងត្បូង និងជប៉ុនផងដែរ។ ដំណើរនេះមានគោលបំណងជំរុញផលប្រយោជន៍សេដ្ឋកិច្ច និងសន្តិសុខជាតិរបស់សហរដ្ឋអាមេរិក ហើយនៅក្នុងប្រទេសចិន គណៈប្រតិភូនេះសង្ឃឹមថា នឹងជួបជាមួយប្រធានាធិបតីចិនលោក Xi Jinping។

ក្នុងជំនួបជាមួយអ្នកការទូតជាន់ខ្ពស់របស់ចិន លោក Wang Yi ក្នុងទីក្រុងប៉េកាំង លោក Schumer បាននិយាយថា៖ «ព្រឹត្តិការណ៍ ដែលកំពុងបន្តកើតមាន នៅក្នុងប្រទេសអ៊ីស្រាអែល ក្នុងរយៈពេលប៉ុន្មានថ្ងៃកន្លងមកនេះ គឺគួរឲ្យរន្ធត់ណាស់។ ខ្ញុំជំរុញឲ្យប្រជាជនចិនឈរខាងប្រជាជនអ៊ីស្រាអែល និងថ្កោលទោសចំពោះការវាយប្រហារដ៏កំសាក និងសាហាវយង់ខ្នងនេះ»៕