ប្រេស៊ីល ៖ ប្រជាពលរដ្ឋរស់នៅក្នុងតំបន់សហគមន៍ Tumbira ស្ថិតនៅក្នុងព្រៃជប់ភ្លៀងអាម៉ាហ្សូន ប្រទេសប្រេស៊ីល កំពុងសម្របខ្លួននឹងគ្រោះរាំងស្ងួតថ្មី ដោយសារតែក្សត់ទឹក ។ 

 សហគមន៍ Tumbiraនេះ ស្ថិតនៅតាមច្រាំងដៃទន្លេរហូតដល់ទន្លេ Negro ដែលជាដៃទន្លេអាម៉ាហ្ស៊ូន ។  

 យោងតាមសេចក្តីរាយការណ៍ពីសារព័ត៌មានក្នុងស្រុក បានឲ្យដឹងថា ចាប់តាំងពីខែមិថុនារហូតមក កម្រិតទឹកទន្លេ Rio Negro បានធ្លាក់ចុះ ១៤,៩ម៉ែត្រ ធ្វើឲ្យកើតមានគ្រោះរាំងស្ងួតដ៏អាក្រក់បំផុតលើកទី ៩នៅក្នុងប្រវត្តិសាស្រ្ត ។ 

កង្វះខាតទឹក បានធ្វើឲ្យប៉ះពាល់ដល់ទម្លាប់រស់នៅ និងវិស័យធុរកិច្ចរបស់អ្នកស្រុក ។ ទូកម៉ាស៊ីនបានជាប់នៅក្នុងភក់ ហើយពួកវាលែងអាចដឹកភ្ញៀវទេសចរទស្សនាទេសភាព ឬសិស្សសាលាទៅសាលារៀនបានទៀតហើយ ។ 

ក្រុមអ្នកជំនាញ និយាយថា គ្រោះរាំងស្ងួតដ៏អាក្រក់នេះ គឺជាលទ្ធផលនៃបាតុភូតអែល នីញ៉ូ ដែលធ្វើផ្ទៃទឹកមហាសមុទ្រប៉ាស៊ីហ្វិកឡើងក្តៅ ។ 

លោក Raimunda Pereiraគឺជាពលរដ្ឋមួយរូបរស់នៅក្នុងសហគមន៍ Tumbiraនិយាយថា ពួកយើងបានមើលឃើញបម្រែបម្រួលអាកាសធាតុ ។ ខ្ញុំមានអាយុ ៨២ឆ្នាំហើយ ហើយកាលពីមុន នៅវេលាម៉ោង ១០ព្រឹក អ្នកអាចដើរលើដីខ្សាច់នៅមាត់ទន្លេបាន ដោយជើងទទេ ប៉ុន្តែឥឡូវ គ្មានអ្នកណាម្នាក់ អាចដើរបាននោះទេ ។ សីតុណ្ហភាព ពិតជាខុសប្លែក ពីមុនខ្លាំងណាស់ ៕