ប៉ូឡូញ ៖ នៅក្នុងការអត្ថាធិប្បាយអំពីទំនាក់ទំនងរវាងអ៊ុយក្រែន និងប៉ូឡូញ លោក អានហ្សេក ឌូដា (Andrzej Duda) ប្រធានាធិបតីនៃសាធារណរដ្ឋប៉ូឡូញ បានសង្កត់ធ្ងន់លើផលប្រយោជន៍របស់ប៉ូឡូញ ហើយបានបន្ថែមថា ប្រទេសទាំងពីរ កំពុងបន្តពិភាក្សាអំពីបញ្ហាចម្រូងចម្រាស នេះបើយោងតាមសារព័ត៌មាន Polsat News។

លោកឌូដា បានពន្យល់ថា ខ្លួនបានបង្ហាញពីការពិតដែលថា មីស៊ីលអ៊ុយក្រែនបានធ្លាក់នៅក្នុងភូមិ Przewodów «ទោះបីជាមានការប្រកែកពីភាគីអ៊ុយក្រែនក៏ដោយ» ក៏«ប្រជាជនប៉ូឡូញ ចាំបាច់ត្រូវដឹងការពិតនេះ»។

លោកបានបន្ថែមថា៖«ដូចគ្នាដែរ ប្រសិនបើគ្រាប់ធញ្ញជាតិពីអ៊ុយក្រែន បានមកដល់ប៉ូឡូញ ដោយជន់លិចទីផ្សាររបស់យើង និងធ្វើឲ្យប៉ះពាល់ដល់ផលប្រយោជន៍របស់កសិករប៉ូឡូញ យើងត្រូវបញ្ចប់វា ជាដាច់ខាត ហើយនោះជាអ្វីដែលយើងបានធ្វើ»។

លោកឌូដា បានបញ្ជាក់ថា ប្រទេសប៉ូឡូញ និងអ៊ុយក្រែន នៅតែបន្តការចរចារ បើទោះបីជាមានការខ្វែងគំនិតគ្នាក្តី។

លោកបានសង្កត់ធ្ងន់ថា៖«[ការចរចា] មិនត្រូវបានផ្អាកទេ។ មិនមានជម្លោះការទូតទេ ដោយបានបន្ថែមថា ក្រុមហ៊ុនការពារជាតិប៉ូឡូញ កំពុងបន្តអនុវត្តតាមកិច្ចសន្យាសម្រាប់ការផ្គត់ផ្គង់គ្រឿងយុទ្ធោបករណ៍ដល់អ៊ុយក្រែន។