អូស្ត្រាលី ៖ ការបោះឆ្នោតពីចម្ងាយ សម្រាប់ការបោះឆ្នោតប្រជាមតិរបស់ប្រទេសអូស្ត្រាលី ដើម្បីទទួលស្គាល់ជនជាតិដើមរបស់ប្រទេសនេះ នៅក្នុងរដ្ឋធម្មនុញ្ញនោះ បានចាប់ផ្តើម កាលពីថ្ងៃចន្ទ (ទី២៥ ខែកញ្ញា) នៅមុនថ្ងៃបោះឆ្នោតថ្ងៃទី១៤ ខែតុលា។

ប្រជាជនអូស្ត្រាលីនឹងត្រូវបានស្នើឲ្យបោះឆ្នោតថា តើពួកគេគាំទ្រការកែប្រែរដ្ឋធម្មនុញ្ញ ដើម្បីរួមបញ្ចូល «សំឡេងទៅកាន់សភា» ដែលជាគណៈកម្មាធិការជនជាតិដើម ដើម្បីផ្តល់យោបល់ដល់សភាសហព័ន្ធលើបញ្ហា ដែលប៉ះពាល់ដល់ជនជាតិដើម និងប្រជាជនកោះ Torres Strait។

ប្រជាជនអូស្ត្រាលី បានបោះឆ្នោតចុងក្រោយក្នុងការធ្វើប្រជាមតិអំពីជនជាតិដើមភាគតិចអូស្ត្រាលី ក្នុងឆ្នាំ ១៩៦៧ ដោយ ៩០,៧៧ភាគរយនៃចំនួនប្រជាជន បានបោះឆ្នោតគាំទ្ររួមបញ្ចូលជនជាតិដើមអូស្ត្រាលីទៅក្នុងតួលេខជំរឿនជាតិ។

យ៉ាងណាក្ដី អូស្ត្រាលីមិនមានសន្ធិសញ្ញាជាមួយជនជាតិដើមភាគតិចរបស់ខ្លួន ដែលមានចំនួនប្រហែល ៣,២ភាគរយនៃចំនួនប្រជាជនជិត ២៦លាននាក់របស់ខ្លួននោះទេ។ ជាមួយគ្នានេះ រាល់ការកែប្រែរដ្ឋធម្មនុញ្ញនៅក្នុងប្រទេសអូស្ត្រាលី ទាមទារមានប្រជាមតិជាតិ ស្របពេលដែលការទទួលបានការកែប្រែរដ្ឋធម្មនុញ្ញ គឺជារឿងលំបាកណាស់ក្នុងប្រទេសនេះ។ កន្លងមក មានសំណើច្បាប់ចំនួន៤៤ ដើម្បីកែប្រែរដ្ឋធម្មនុញ្ញ ក្នុងការធ្វើប្រជាមតិចំនួន១៩ ហើយមានតែចំនួន៨ នៃសំណើច្បាប់ទាំងនោះប៉ុណ្ណោះ ដែលទទួលបានការអនុម័ត៕