អ៊ីស្រាអែល ៖[ កាលពីថ្ងៃអាទិត្យម្សិលមិញ ប្រធានាធិបតីអ៊ីរ៉ង់លោក Ebrahim Raisi បានអបអរសាទរក្រុមជីវពលប៉ាឡេស្ទីន សម្រាប់អ្វីដែលលោកចាត់ទុកថាជាជ័យជំនះ ក្រោយការវាយប្រហារបង្ហូរឈាមខ្លាំងបំផុតនៅក្នុងប្រវត្តិសាស្រ្តអ៊ីស្រាអែល ពេលដែលក្រុមអ៊ីស្លាមហាម៉ាស់ សម្លាប់ជនជាតិអ៊ីស្រាអែល ៧០០នាក់ និងចាប់ខ្លួនមនុស្សរាប់សិបនាក់ផ្សេងទៀត ។ 

 ថ្លែងអំឡុងជំនួបគណៈរដ្ឋមន្រ្តីនៅទីក្រុងតេអេរ៉ង់ លោក Raisi បាននិយាយថា ការវាយប្រហារនេះ គឺជាការបង្ហាញពីការតស៊ូ ។ 

លោក Raisi និយាយថា វាគឺជាការក្រោកឈរប្រឆាំងនឹងរបបហ្សាអឺនក្លែងក្លាយ ។ ជនប៉ាឡេស្ទីន ទាហានប៉ាឡេស្ទីន ក្រុមប៉ាឡេស្ទីនទាំងអស់ និងសហគមន៍អ៊ីស្លាមទាំងអស់ គួរតែអបអរសាទរសម្រាប់ជ័យជំនះមួយនេះ ។ 

ទីភ្នាក់ងារព័ត៌មានរដ្ឋអ៊ីរ៉ង់ IRNA បានរាយការណ៍ដោយពុំបានផ្តល់សេចក្តីលម្អិតថា លោក Raisi បានពិភាក្សាលើដំណើរវិវត្តន៍ចុងក្រោយនៅប៉ាឡេស្ទីន អំឡុងការជជែកគ្នាតាមទូរស័ព្ទដាច់ដោយឡែកមួយទៀត ជាមួយលោក Ziyad al-Nakhalah ដែលជាអគ្គនាយកចលនាអ៊ីស្លាមជីហាដ ហើយនិងលោក Ismail Haniyeh ដែលជាប្រធានការិយាល័យនយោបាយរបស់ក្រុមហាម៉ាស់ ។ 

ដោយឡែក លោក Ali Akbar Velayati គឺជាទីប្រឹក្សាជាន់ខ្ពស់របស់មេដឹកនាំកំពូលអ៊ីរ៉ង់លោក Ayatollah Ali Khamenei បាននិយាយថា នេះគឺជាប្រតិបត្តិការឈ្នះឈ្នះ ដែលនឹងសម្របសម្រួល ក៏ដូចជាពន្លឿនការដួលរលំរបស់របបហ្សាអឺន ៕