​បាល់ទាត់៖ ប្រធាន​ក្លិប​ Manchester City លោក Khaldoon al-Mubarak បាន​បញ្ជាក់​ថា ​ក្លិប​នឹង​ចំណាយ​លុយ​ធំ​ក្នុង​ការ​នាំចូល​កីឡាករ​ថ្មី​ មក​ពង្រឹង​ក្រុម​នៅ​រដូវ​កាល​ក្រោយ​។ ​លោក Khaldoon បាន​បញ្ជាក់​ថា ក្រោយ​ចាញ់ Chelsea នៅ​វគ្គ​ផ្ដាច់ព្រ័ត្រ UEFA Champions League អ្វីៗ​មិន​ត្រូវ​បញ្ចប់​ទេ Manchester City នឹង​ត្រលប់​មកវិញ​រដូវ​កាល​ក្រោយ​។

​​កីឡាករ​ដែល​នឹង​នាំចូល​នៅ​រដូវ​ក្តៅ​ខាងមុខ ​នឹង​ជា​កីឡាករ​ដែល​មាន​គុណភាព​លោក Khaldoon បន្ថែម​។ ​ការ​លើក​ឡើង​របស់​ប្រធាន​ក្លិប Manchester City ស្រប​ពេល​ពាក្យ​ចចាម​អារ៉ាម​កាន់​ខ្លាំង ​ពាក់ព័ន្ធ​នឹង​អនាគត​របស់​ខ្សែប្រយុទ្ធ​អង់គ្លេស Harry Kane ដែល​នឹង​អាច​ជា​ជំរើស​ដំបូង​ដែល​នឹង​អាច​មក​កាន់​ទឹកដី Etihad ដើម្បី​បំពេញ​តំបន់​ប្រយុទ្ធ​ដែល​ខ្វះខាត​ បន្ទាប់​ពី Sergio Aguero ចាក​ចេញ​ទៅ Barcelona​។​ ​និយាយ​ក្រៅពី​ការទិញ​ដូរ​កីឡាករ​លោក Khaldoon al-Mubarak បាន​ការពារ​ជំរើស ១១​នាក់​ដំបូង​របស់​លោក Pep Guardiola នៅ​វគ្គ​ផ្ដាច់ព្រ័ត្រ​ចាញ់ Chelsea នោះ បន្ទាប់ពី​មានការ​រិះគន់​ខ្លាំង និង​ថែមទាំង​និយាយ​ថា​ នេះ​ជា​រជ្ជកាល​មាស​របស់ Manchester City ហើយ​៕

​អត្ថបទ​៖​នាង សុភា​វុ​ធ