អុីស្រាអែល ៖ បេក្ខជនប្រធានាធិបតីចំនួនប្រាំនាក់របស់ប្រទេសអាហ្សង់ទីន បានប្រឈមមុខគ្នានៅក្នុងការជជែកដេញដោលតាមទូរទស្សន៍ចុងក្រោយ កាលពីថ្ងៃអាទិត្យ (ទី៨ តុលា) នៅមុនការបោះឆ្នោតថ្ងៃទី២២ ខែតុលា ដោយបញ្ហាស្តីពីសន្តិសុខ ការងារ បម្រែបម្រួលអាកាសធាតុ និងការវាយប្រហាររបស់ក្រុមហាម៉ាសប្រឆាំងនឹងអ៊ីស្រាអែល គឺស្ថិតក្នុងចំណោមប្រធានបទផ្សេងៗទៀត។

លើផ្នែកសន្តិសុខ បេក្ខភាពរបស់គណបក្សកាន់អំណាច និងជាអ្នកឈ្នះលំដាប់ទី២ នៅក្នុងការស្ទង់មតិ គឺលោក Sergio Massa បានសន្យាថា នឹងបង្កើតទីភ្នាក់ងារសហព័ន្ធអាហ្សង់ទីន ដែលស្រដៀងនឹងការិយាល័យស៊ើបអង្កេតសហព័ន្ធ (FBI) របស់សហរដ្ឋអាមេរិក និងរួមបញ្ចូលក្រុមហាម៉ាសទៅក្នុងបញ្ជីអង្គការភេរវករ។

មេដឹកនាំស្តាំនិយមកណ្តាល និងជាអតីតរដ្ឋមន្ត្រីសន្តិសុខ លោកស្រី Patricia Bullrich បានវាយប្រហារចំពោះសេរីភាវូបនីយកម្មនៃឧស្សាហកម្មសព្វាវុធ និងការលក់សរីរាង្គមនុស្ស ជាគំនិតផ្ដួចផ្ដើម២ ដែលមានជាប់ទាក់ទងនឹងបេក្ខជនសេរីនិយម និងជាអ្នកនាំមុខគេ ក្នុងការស្ទង់មតិ គឺលោក Javier Milei។

បេក្ខជនប្រធានាធិបតី សម្រាប់គណបក្ស Libertad Avanza លោក Milei បានពិភាក្សាអំពីការបម្រែបម្រួលអាកាសធាតុ ដោយនិយាយថា វាជាផ្នែកមួយរបស់ប្រព័ន្ធនៃ «វដ្តចក្រសីតុណ្ហភាព» នៅក្នុងប្រវត្តិសាស្រ្តរបស់ភពផែនដី៕