អុីរ៉ង់ ៖ ប្រទេសអ៊ីរ៉ង់បានអំពាវនាវឲ្យមានកិច្ចប្រជុំបន្ទាន់មួយរបស់អង្គការសហប្រតិបត្តិការអ៊ីស្លាម (OIC) ខណៈដែលការប្រយុទ្ធគ្នា រវាងក្រុមហាម៉ាស និងកងកម្លាំងអ៊ីស្រាអែលបានផ្ទុះឡើង បន្ទាប់ពីមានការវាយប្រហារកាលពីចុងសប្តាហ៍លើអ៊ីស្រាអែល។ នេះបើតាមអ្នកនាំពាក្យក្រសួងការបរទេសអ៊ីរ៉ង់ នៅថ្ងៃចន្ទ (ទី៩ ខែតុលា) នេះ។

អ្នកនាំពាក្យអ៊ីរ៉ង់ លោក Nasser Kanaani បាននិយាយថា៖ «ទីក្រុងតេអេរ៉ង់ បានអំពាវនាវឲ្យមានកិច្ចប្រជុំបន្ទាន់នៃអង្គការសហប្រតិបត្តិការឥស្លាម (OIC) ដើម្បីពិភាក្សាអំពីការវិវឌ្ឍ ក្នុងតំបន់»។

ជាមួយគ្នានេះ អ៊ីរ៉ង់បានប្រាប់ថា ខ្លួនមិនជាប់ពាក់ព័ន្ធក្នុងការវាយប្រហារ ដែលជនជាតិអ៊ីស្រាអែលយ៉ាងហោចណាស់ចំនួន ៧០០នាក់ត្រូវបានសម្លាប់ និងរាប់សិបនាក់ទៀតត្រូវបានចាប់ខ្លួន ដោយក្រុមអ៊ីស្លាមហាម៉ាស។ ជនជាតិប៉ាឡេស្ទីនជាង ៤០០នាក់ ក៏ត្រូវបានសម្លាប់ផងដែរ។

ដូចគ្នាដែរ រដ្ឋមន្ត្រីការបរទេសអាមេរិក លោក Antony Blinken បាននិយាយថា មិនមានភ័ស្តុតាង ដែលបញ្ជាក់ថា អ៊ីរ៉ង់នៅពីក្រោយការវាយប្រហារចុងក្រោយបង្អស់នេះលើអ៊ីស្រាអែលនោះទេ ប៉ុន្តែលោកបានលើកឡើងពីទំនាក់ទំនងដ៏យូរអង្វែង រវាងទីក្រុងតេអេរ៉ង និងក្រុមហាម៉ាស។

ការវាយប្រហាររបស់ក្រុមហាម៉ាស ដែលជាការលុកលុយដ៏ធំបំផុតចូលទៅក្នុងទឹកដីរបស់អ៊ីស្រាអែល ក្នុងរយៈពេលជាច្រើនទស្សវត្សរ៍ កើតមានស្របពេលជាមួយនឹងវិធានការគាំទ្ររបស់សហរដ្ឋអាមេរិក ដើម្បីជំរុញប្រទេសអារ៉ាប៊ីសាអ៊ូឌីតឆ្ពោះទៅរកការធ្វើឲ្យមានប្រក្រតីភាពទំនាក់ទំនងជាមួយអ៊ីស្រាអែល ជាថ្នូរនឹងកិច្ចព្រមព្រៀងការពារជាតិ រវាងទីក្រុងវ៉ាស៊ីនតោន និងទីក្រុងរីយ៉ាដ។ ការធ្វើបែបនេះនឹងធ្វើឲ្យមានការប៉ះទង្គិចដល់ការផ្សះផ្សាគ្នា នាពេលថ្មីៗនេះរបស់អារ៉ាប៊ីសាអ៊ូឌីតជាមួយនឹងទីក្រុងតេអេរ៉ង់៕