មេធាវីតំណាងឲ្យរដ្ឋាភិបាល បានប្រាប់តុលាការកំពូលរបស់ចក្រភពអង់គ្លេស នៅថ្ងៃចន្ទ (ទី៩ ខែតុលា) នេះ ថា មានតម្រូវការសំខាន់ចាំបាច់ និងបន្ទាន់ សម្រាប់ផែនការរបស់រដ្ឋាភិបាល ក្នុងការនិរទេសជនអន្តោប្រវេសន៍ទៅកាន់ប្រទេសរ៉្វាន់ដា ដែលជាគោលនយោបាយមួយ ក្នុងចំណោមគោមនយោបាយសំខាន់ៗរបស់នាយករដ្ឋមន្ត្រី លោក Rishi Sunak ខណៈដែលរដ្ឋាភិបាលស្វះស្វែងរកការលុបចោលនូវសេចក្តីសម្រេច ដែលប្រកាសថា ការធ្វើបែបនេះ គឺខុសច្បាប់។

សូមរំលឹកថា កាលពីខែមិថុនា សាលាឧទ្ធរណ៍ទីក្រុងឡុងដ្រ៍ បានសម្រេចថា គម្រោងការបញ្ជូនជនអន្តោប្រវេសន៍រាប់ម៉ឺននាក់ចម្ងាយជាង ៤.០០០ម៉ាយល៍ (៦.៤០០គីឡូម៉ែត្រ) ទៅកាន់អាហ្វ្រិកខាងកើត គឺមិនស្របតាមច្បាប់នោះទេ ដោយលើកឡើងថា រ៉្វាន់ដាមិនអាចចាត់ទុកបានថា ជាប្រទេសទី៣ ដែលមានសុវត្ថិភាពនោះឡើយ។

តុលាការបានសម្រេចថា អ្នកដែលត្រូវបានបញ្ជូនទៅប្រទេសរ៉្វាន់ដា នឹងមានហានិភ័យ ក្នុងការត្រូវបានបញ្ជូនទៅប្រទេសកំណើត ជាកន្លែងដែលពួកគេអាចប្រឈមនឹងការធ្វើទុក្ខបុកម្នេញ បើទោះបីជាមានការអះអាងសិទ្ធិជ្រកកោនស្របច្បាប់ក៏ដោយ។ នេះនឹងធ្វើឲ្យគោលនយោបាយមិនស្របច្បាប់ ក្រោមច្បាប់សិទ្ធិមនុស្សរបស់ចក្រភពអង់គ្លេស (HRA) ដែលបានធ្វើឲ្យអនុសញ្ញាអឺរ៉ុបស្តីពីសិទ្ធិមនុស្ស (ECHR) ជាផ្នែកនៃច្បាប់របស់ចក្រភពអង់គ្លេស។

ការសម្រេចចិត្តនេះ បានធ្វើឲ្យមានការប៉ះទង្គិចយ៉ាងខ្លាំងដល់ការសន្យារបស់លោក Sunak ក្នុងការទប់ស្កាត់នូវការមកដល់នៃជនអន្តោប្រវេសន៍រាប់ពាន់នាក់ ដែលធ្វើដំណើរតាមទូកតូចៗ នៅឆ្នេរសមុទ្រភាគខាងត្បូងនៃប្រទេសអង់គ្លេស៕