បាល់ទាត់៖ ក្រុមជម្រើសជាតិកម្ពុជានឹងត្រូវប្រកួត ជាមួយក្រុមម្ចាស់ផ្ទះបារ៉ែននាវេលាម៉ោង ១១៖៣០នាទីយប់ថ្ងៃទី៣ ខែមិថុនានេះត្រូវនឹងម៉ោងនៅកម្ពុជា នៅក្នុងជំនួបវគ្គជម្រុះពានរង្វាន់បាល់ទាត់ពិភពលោក FIFA World Cup Qatar 2022 ពូល C ខណៈលោក Ryu Hirose គ្រូបង្វឹកក្រុមគោព្រៃកម្ពុជាបានបង្ហាញការជឿជាក់លើកូនក្រុម ពិសេសកីឡាករវ័យក្មេងនឹងបង្ហាញនូវទម្រង់លេងមួយដ៏គាប់ប្រសើរ ក្នុងជំនួបជាមួយក្រុមកំពុងឈរលេខ២ ក្នុងពូលនេះ។
លោក Ryu Hirose បានបញ្ជាក់ថា វាពិតជាមានការប្រកួតប្រជែងខ្លាំងណាស់ ដើម្បីទទួលបានលទ្ធផលដែលខ្លួនចង់បាននៅក្នុងពូលនេះ ប៉ុន្តែកម្ពុជាមិនដែលបោះបង់ឆន្ទៈដើម្បីប្រជែងនឹងក្រុមដទៃទេ ជាក់ស្ដែងការប្រកួតជាមួយក្រុមជម្រើសជាតិបារ៉ែនយប់នេះ លោកថា បារ៉ែនគឺជាក្រុមល្អទាក់ទងនឹងសមត្ថភាពរាងកាយ ប៉ុន្តែក្រុមកម្ពុជាមិនស្ទាក់ស្ទើរក្នុងការប្រជែងជាមួយពួកគេឡើយ។ ជុំវិញការជ្រើសរើសកីឡាករវ័យក្មេងចូលរួមប្រកួតជម្រុះនេះវិញ គ្រូបង្វឹកសញ្ជាតិជប៉ុនដដែលបន្ដថា ការជ្រើសរើសកីឡាករថ្មី និងក្មេងមួយចំនួននេះ ព្រោះគោលដៅផ្សេងមួយទៀតគឺ SEA Games។ លោកចង់ឲ្យពួកគេមានឱកាសលេង និងទទួលបានបទពិសោធន៍ដ៏មានតម្លៃសម្រាប់អនាគតពួកគេ និងអនាគតនៃបាល់ទាត់កម្ពុជា។
លោកគិតថា ពួកគេមានសក្ដានុពលក្នុងការប្រយុទ្ធ បើប្រៀបធៀបជាមួយកីឡាករដែលមានបទពិសោធន៍មួយចំនួន។ ពួកគេមានទំនុកចិត្តខ្ពស់ ទោះបីពួកគេនៅក្មេងក៏ដោយ។ លោកជឿជាក់ថា ពួកគេនឹងបង្ហាញអ្នកគាំទ្រនូវទម្រង់លេងគាប់ប្រសើរមួយយប់នេះ។ គួរដឹងថា ក្រុមជម្រើសជាតិកម្ពុជានៅសល់ការប្រកួត ជម្រុះពានរង្វាន់បាល់ទាត់ពិភពលោកឆ្នាំ២០២២ ចំនួន ៣ប្រកួតក្នុងដៃ ខណៈបន្ទាប់ពីជួបម្ចាស់ផ្ទះបារ៉ែនយប់នេះ កម្ពុជានឹងបន្ដជួបក្រុមជម្រើសជាតិអ៊ីរ៉ាក់នាថ្ងៃទី៧ ខែមិថុនា វេលាម៉ោង ៩៖៣០នាទីយប់ (ម៉ោងនៅកម្ពុជា) និងចុងក្រោយជួបក្រុមជម្រើសជាតិអ៊ីរ៉ង់នាថ្ងៃទី១១ ខែមិថុនា វេលាម៉ោង ៩៖៣០នាទីយប់ (ម៉ោងនៅកម្ពុជា)។ សម្រាប់បេសកកម្មសេសសល់របស់ក្រុមគោព្រៃកម្ពុជានេះដែរ នឹងមានផ្សាយផ្ទាល់លើកញ្ចក់ទូរទស្សន៍ BTV-News៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
