ប្រទេសចិន នៅថ្ងៃចន្ទ (ទី៩ ខែតុលា) បាននិយាយថា ខ្លួន «ប្រឆាំង និងថ្កោលទោស» ចំពោះអំពើហិង្សាលើជនស៊ីវិល ក្នុងដែនដីអ៊ីស្រាអែល និងប៉ាឡេស្ទីន។

អ្នកនាំពាក្យក្រសួងការបរទេសចិន លោកស្រី Mao Ning បានប្រាប់ថា៖ «ប្រទេសចិនមានការព្រួយបារម្ភយ៉ាងខ្លាំងអំពីការកើនឡើងនៃជម្លោះនាពេលថ្មីៗនេះ រវាងប៉ាឡេស្ទីន និងអ៊ីស្រាអែល។ ទីក្រុងប៉េកាំងមានការសោកស្ដាយជាពន់ពេក ចំពោះការបាត់បង់ជីវិតជនស៊ីវិល ដែលបណ្តាលមកពីជម្លោះនេះ ហើយប្រឆាំង និងថ្កោលទោស ចំពោះសកម្មភាព ដែលបង្កគ្រោះថ្នាក់ដល់ជនស៊ីវិល»។

លោកស្រី Mao បានបន្ថែមថា៖ «ចិនប្រឆាំងសកម្មភាព ដែលធ្វើឲ្យជម្លោះកាន់តែរីករាលដាល និងបំផ្លាញស្ថិរភាពក្នុងតំបន់ ហើយសង្ឃឹមថា នឹងមានបទឈប់បាញ់ និងបញ្ចប់សង្រ្គាម និងស្ដារសន្តិភាពឲ្យបានឆាប់តាមដែលអាចធ្វើទៅបាន»។

លោកស្រីក៏បានអំពាវនាវឲ្យសហគមន៍អន្តរជាតិ «ដើរតួនាទីរបស់ខ្លួនប្រកបដោយប្រសិទ្ធភាព និងរួមគ្នាលើកកម្ពស់ការបន្ថយកម្ដៅនៃស្ថានការណ៍»។ លោកស្រី Mao បាននិយាយថា «ផ្លូវដើម្បីដោះស្រាយវដ្ដចក្រនៃជម្លោះប៉ាឡេស្ទីន-អ៊ីស្រាអែល គឺស្ថិតនៅក្នុងការបន្តការចរចាសន្តិភាព»។

កាលពីថ្ងៃទី៧ ខែតុលា ក្រុមសកម្មប្រយុទ្ធប៉ាឡេស្ទីន បានបាញ់មីស៊ីលជិត ៣.០០០គ្រាប់ប្រឆាំងនឹងអ៊ីស្រាអែល ហើយក្រុមសកម្មប្រយុទ្ធរាប់សិបនាក់ បានសម្រុកចូលចូលទឹកដីអ៊ីស្រាអែលភាគខាងត្បូងដោយធ្វើជម្លោះ រវាងអ៊ីស្រាអែល និងក្រុមហាម៉ាសប៉ាឡេស្ទីនឈេះឡើងវិញ។

ឧបទ្ទវហេតុនេះបានកើតឡើងចំពេលមានភាពតានតឹងកើនឡើងជាច្រើនខែនៅតាមព្រំដែនអ៊ីស្រាអែល-លីបង់ និងមួយថ្ងៃបន្ទាប់ពីក្រុមហាម៉ាស ដែលជាក្រុមអ៊ីស្លាមនិយមប៉ាឡេស្ទីន ដែលគ្រប់គ្រងតំបន់ហ្គាហ្សាស្ទ្រីប បានបើកការវាយប្រហារដ៏ធំលើអ៊ីស្រាអែល ដោយបានសម្លាប់ជនជាតិអ៊ីស្រាអែលយ៉ាងហោចណាស់ ៣០០នាក់។ ជាការឆ្លើយតប អ៊ីស្រាអែលបានបើកការវាយប្រហារតាមអាកាសទៅលើតំបន់ហ្គាហ្សា ដោយបានសម្លាប់ជនជាតិប៉ាឡេស្ទីនយ៉ាងតិច ៣១៣នាក់៕