ភ្នំពេញ៖ ក្រសួងសុខាភិបាលកម្ពុជា បានអំពាវនាវ និងក្រើនរំលឹកដល់ជនរួមជាតិទាំងអស់ឲ្យមានការប្រុងប្រយ័ត្នខ្ពស់បន្ថែមទៀត ក្រោយក្រសួងរកឃើញថាមានកុមារីម្នាក់ទៀតនៅខេត្តព្រៃវែងបានបាត់បង់ជីវិតដោយសារតែជំងឺ H5N1។

 យោងតាមសេចក្តីប្រកាសព័ត៌មានរបស់ក្រសួងសុខាភិបាល ដែលបានចេញនាយប់ថ្ងៃទី៩ ខែតុលា ឆ្នាំ២០២៣នេះ បានបញ្ជាក់ថា មានជំងឺផ្តាសាយបក្សីមួយករណីទៀត ដោយកើតលើកុមារីអាយុ២ ឆ្នាំដែលបានស្លាប់ដោយសារតែជំងឺ H5N1 ខណៈកុមារីនេះមានលំនៅក្នុងភូមិឆ្មាលោត ឃុំស្នោងខាងត្បូង ស្រុកកំចាយមារ ខេត្តព្រៃវែង។ ក្រសួងបានបញ្ជាក់ទៀតថា មុននឹងកុមារីខាងលើនេះស្លាប់ផ្ទះរបស់កុមារី នេះមានមាន់ងាប់ជាហូរហែរកាលពីកន្លងទៅ។

 យ៉ាងណាក៏ដោយក្រសួងសុខាភិបាល សូមក្រើនរំលឹកសារជាថ្មីម្តងទៀត ដល់បងប្អូនជនរួមជាតិ ទាំងអស់«សូមយកចិត្តទុកដាក់ប្រុងប្រយ័ត្នលើជំងឺផ្តាសាយបក្សីជានិច្ច ពីព្រោះជំងឺផ្តាសាយបក្ស H5N1 នៅតែបន្តគំរាមកំហែងដល់សុខភាពប្រជាពលរដ្ឋជាពិសេសលើកុមារដែលជាក្រុមឈានហានិភ័យ និង មានភាពងាយរងគ្រោះ»។ ក្រសួងបានឲ្យដឹងផងដែរថា ករណីដែលបានស្លាប់នេះ គឺជាករណីផ្តាសាយបក្សីទី៥៩ (ស្លាប់៤០នាក់) ដែលកើតមានលើមនុស្ស ចាប់តាំងពីឆ្នាំ២០០៥ ហើយនេះគឺជាករណីទី៣ដែលកើតឡើងនៅក្នុង ឆ្នាំ២០២៣នេះ។

 ក្រោយកុមារីខាងលើបានស្លាប់ នាពេលនេះក្រសួងសុខាភិបាល ទាំងថ្នាក់ជាតិ និងក្រោមជាតិ បាននិងកំពុងអង្កេតស្រាវជ្រាវការកើតឡើងនូវជំងឺផ្តាសាយបក្សីប្រភេទនេះ និងធ្វើការឆ្លើយតបទៅតាម វិធីសាស្រ្ត និងពិធីសាររបស់ជាតិ បានសហការគ្នារវាងក្រុមឆ្លើយតបបន្ទាន់ផ្នែកសុខាភិបាល ស្វែងរកប្រ ភពចម្លង ទាំងលើសត្វ និងមនុស្ស និងបន្តស្វែងរកករណីសង្ស័យ និងអ្នកប៉ះពាល់ដើម្បីទប់ស្កាត់ការឆ្លង បន្តទៅអ្នកដទៃក្នុងសហគមន៍ ព្រមទាំងចែកជូនឱសថតាមីហ្លូដល់អ្នកប៉ះពាល់ជិតស្និទ្ធ និងធ្វើយុទ្ធនាការ អប់រំសុខភាពប្រជាពលរដ្ឋនៅក្នុងភូមិដែលបានកើតហេតុខាងលើនេះផងដែរ។

 តាមរយៈសេចក្តីប្រកាសព័ត៌មាននេះ ក្រសួងសុខាភិបាលក៏បានក្រើនរំលឹកដល់ប្អូនប្រជាពលរដ្ឋ ទាំងអស់ត្រូវមានវិធានការបង្ការជាប្រចាំ ដោយលាងដៃឲ្យបានញឹកញាប់ ជាមួយសាប៊ូនិងទឹកមុនពេល បរិភោគ និងបន្ទាប់ពីប៉ះពាល់ជាមួយបក្សី ត្រូវដាក់កុមារនៅឆ្ងាយពីសត្វបក្សី និងដាក់សត្វបក្សីនៅឲ្យឆ្ងាយ ពីកន្លែងរស់នៅ ហើយកុំបរិភោគសត្វបក្សីឈឺឬងាប់ និងរាល់សត្វបក្សីដែលធ្វើសម្រាប់បរិភោគត្រូវចំអិន ឲ្យឆ្អិនបានល្អជាដើម៕ អត្ថបទ៖ បាន ចក់