ស៊ីហ្គេម៖ គណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានប្រកាសតែងតាំងលោកព្រឹទ្ធបុរសវេជ្ជបណ្ឌិត សុក សារឿន ជាប្រធានគណៈកម្មការវេជ្ជសាស្ត្រ និងដូភីង ជំនួសលោកវេជ្ជបណ្ឌិត ស្ដើង ជា ដែលបានទទួលមរណភាពដោយសាររោគាពាធ និងជំងឺកូវីដ-១៩ កាលពីថ្ងៃទី២២ ខែមីនាកន្លងទៅ។
ពិធីប្រកាស និងតែងតាំងលោកព្រឹទ្ធបុរសវេជ្ជបណ្ឌិត សុក សារឿន ជាប្រធានគណៈកម្មការវេជ្ជសាស្ត្រ និងដូភីងរបស់គណៈកម្មាធិការជាតិ CAMSOC នេះ បានធ្វើឡើងក្រោមវត្តមានឯកឧត្ដមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ CAMSOC កាលពីថ្ងៃទី២ ខែមិថុនាម្សិលមិញ នៅទីស្នាក់ការគណៈកម្មាធិការជាតិអូឡាំពិកកម្ពុជា។ ឯកឧត្ដម វ៉ាត់ ចំរើន អគ្គលេខាធិការ CAMSOC បានបញ្ជាក់ថា ការតែងតាំងក្បាលម៉ាស៊ីនថ្មី នៃគណៈកម្មការវេជ្ជសាស្ត្រ និងដូភីងនេះ គឺដើម្បីជំរុញការងារវេជ្ជសាស្ត្រកីឡា និងជួយដល់ការងារថែរក្សាសុខភាពកីឡាករ-កីឡាការិនីត្រៀមចូលរួមការប្រកួតអន្តរជាតិនានា ពិសេសដំណើរឆ្ពោះទៅស៊ីហ្គេមឆ្នាំ២០២៣ នៅកម្ពុជា។
គួរបញ្ជាក់ថា ការតែងតាំង និងផ្លាស់ប្ដូរសមាសភាពគណៈកម្មការវេជ្ជសាស្ត្រ និងដូភីងនៃគណៈកម្មាធិការជាតិ CAMSOC ធ្វើឡើងក្រោយមានការសម្រេចរបស់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ CAMSOC កាលពីថ្ងៃទី២០ ខែឧសភាកន្លងទៅ ដោយតែងតាំងលោកព្រឹទ្ធបុរសវេជ្ជបណ្ឌិត សុក សារឿន ជាប្រធានគណៈកម្មការនេះ បន្ទាប់ពីមើលឃើញថា លោកគឺជាវេជ្ជបណ្ឌិតដែលមានចំណេះជំនាញច្រើន ពាក់ព័ន្ធនឹងវេជ្ជសាស្ត្រកីឡា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
