អាមេរិក ៖ មេដឹកនាំ សហរដ្ឋអាមេរិក ចក្រភពអង់គ្លេស អាល្លឺម៉ង់ បារាំង និងអ៊ីតាលីបានបង្ហាញការគាំទ្រសម្រាប់ប្រទេសអ៊ីស្រាអែល និងសិទ្ធស្វ័យការពាររបស់ខ្លួន ពីការវាយប្រហារដោយក្រុមហាម៉ាស់អ៊ីស្លាមនិយម នៅប៉ាឡេស្ទីន។ 

ប្រធានាធិបតីសហរដ្ឋអាមេរិក លោក Joe Biden នាយករដ្ឋមន្ត្រីអង់គ្លេសលោក Rishi Sunak អធិការបតីអាល្លឺម៉ង់ លោក Olaf Scholz ប្រធានាធិបតីបារាំងលោក Emmanuel Macron និងនាយករដ្ឋមន្ត្រីអ៊ីតាលី លោកស្រី Giorgia Meloni បានសន្ទនាគ្នាតាមទូរស័ព្ទកាលពីថ្ងៃចន្ទ។

សេចក្តីថ្លែងការណ៍រួមរបស់ពួកគេ បានសម្តែងការគាំទ្ររួបរួម និងមិនប្រែប្រួលរបស់ពួកគេ ចំពោះរដ្ឋអ៊ីស្រាអែល និងថ្កោលទោសយ៉ាងខ្លាំងចំពោះក្រុមហាម៉ាស់ និងសកម្មភាពភេរវកម្មដ៏រន្ធត់របស់ក្រុមនេះ។ 

មេដឹកនាំទាំងអស់ បានបញ្ជាក់ថា ប្រទេសរបស់ពួកគេ នឹងគាំទ្រអ៊ីស្រាអែល ក្នុងកិច្ចប្រឹងប្រែងរបស់ខ្លួន ដើម្បីការពារខ្លួន និងប្រជាជនរបស់ប្រទេសនេះ ប្រឆាំងអំពើឃោឃៅបែបនេះ។ 

ពួកគេនិយាយថា ប្រទេសទាំង៥ នឹងនៅរួបរួមគ្នា និងសម្របសម្រួល។