ឧត្តមសេនីយ៍ជន់ខ្ពស់របស់សហរដ្ឋអាមេរិក កាលពីថ្ងៃចន្ទ (ទី៩ ខែតុលា) បានព្រមានអ៊ីរ៉ង់កុំឲ្យចូលរួមក្នុងវិបត្តិ នៅប្រទេសអ៊ីស្រាអែល ហើយបាននិយាយថា លោកមិនចង់ឲ្យជម្លោះកាន់តែរីករាលដាលនោះទេ ខណៈដែលក្រុមប្រដាប់អាវុធលីបង់ Hezbollah បានបាញ់មីស៊ីលជាច្រើនគ្រាប់ទៅចូលទៅភាគខាងជើងអ៊ីស្រាអែល។

សេតវិមាន នៅព្រឹកថ្ងៃចន្ទនោះ បាននិយាយថា អ៊ីរ៉ង់មានការពាក់ព័ន្ធដោយខុសច្បាប់ បើទោះបីជាសហរដ្ឋអាមេរិក មិនមានព័ត៌មានសម្ងាត់ ឬភ័ស្តុតាង ដែលចង្អុលបង្ហាញពីការចូលរួមដោយផ្ទាល់របស់អ៊ីរ៉ង់ ក្នុងការវាយប្រហារ នៅអ៊ីស្រាអែល ដោយក្រុមអ៊ីស្លាមប៉ាឡេស្ទីនហាម៉ាសក៏ដោយ។

នៅពេលត្រូវបានសួរថា តើសាររបស់លោកសម្រាប់អ៊ីរ៉ង់ គឺជាអ្វី ឧត្តមសេនីយ៍លោក Charles Q. Brown ដែលជាប្រធាននៃអគ្គសេនាធិការចម្រុះ បាននិយាយថា «កុំមានការពាក់ព័ន្ធឲ្យសោះ»។

ការបាញ់ផ្លោងរបស់អ៊ីស្រាអែលទៅលើលីបង់ បានសម្លាប់ក្រុមសកម្មប្រយុទ្ធ Hezbollah យ៉ាងហោចណាស់ ៣នាក់ កាលពីថ្ងៃចន្ទ ហើយអ៊ីស្រាអែលបាននិយាយថា មន្ត្រីរបស់ខ្លួនម្នាក់ត្រូវបានសម្លាប់ អំឡុងការវាយឆ្មក់ឆ្លងព្រំដែន នៅមុននោះ ដែលត្រូវបានអះអាងដោយប៉ាឡេស្ទីននៅក្នុងប្រទេសលីបង់ថា ជាស្នាដៃរបស់ខ្លួន។

អំពើហិង្សាឆ្លងព្រំដែនបានបង្ហាញឲ្យឃើញការរីករាលដាលយ៉ាងខ្លាំងក្លានៃជម្លោះ រវាងអ៊ីស្រាអែល និងពួកសកម្មប្រយុទ្ធប៉ាឡេស្ទីន នៅតំបន់ហ្គាហ្សា រហូតទៅដល់ព្រំដែនអ៊ីស្រាអែល-លីបង់ភាគខាងជើងបន្ថែមទៀត។ ក្រុម Hezbollah ដែលគាំទ្រដោយអ៊ីរ៉ង់ និងអ៊ីស្រាអែល បានប្រយុទ្ធគ្នាយ៉ាងខ្លាំងក្លារយៈពេលមួយខែ នៅក្នុងឆ្នាំ២០០៦៕