ចំនួនអ្នកស្លាប់ដោយសារជំងឺគ្រុនឈាមនៅក្នុងប្រទេសបង់ក្លាដែស រហូតមកដល់ពេលនេះក្នុងឆ្នាំនេះ កើនឡើងដល់ជិត១.១០០ នាក់ ក្នុងពេលមានការផ្ទុះឡើងដ៏អាក្រក់បំផុតនៃជំងឺឆ្លងតាមសត្វមូស។

រដ្ឋាភិបាលបង់ក្លាដែស កាលពីថ្ងៃចន្ទ បានបញ្ជាក់ពីចំនួនអ្នកស្លាប់ ១០ នាក់បន្ថែមទៀត ដោយសារជំងឺគ្រុនឈាម នាំឱ្យចំនួនអ្នកស្លាប់សរុបនៅក្នុងប្រទេសចាប់តាំងពីខែមករា កើនឡើងដល់ ១.០៩៦នាក់។

យោងតាមអគ្គនាយកដ្ឋានសេវាសុខភាព (DGHS) ក្រោមក្រសួងសុខាភិបាលបានឲ្យដឹងថា អ្នកស្លាប់រួមមាន ១០៧នាក់នៅក្នុងខែតុលា ៣៩៦នាក់នៅក្នុងខែកញ្ញា ៣៤២នាក់នៅក្នុងខែសីហា និង ២០៤នាក់ នៅក្នុងខែកក្កដា។

យោងតាមអគ្គនាយកដ្ឋានសេវាសុខភាព(DGHS) បានឲ្យដឹងថា ចាប់ពីថ្ងៃទី ១ ដល់ថ្ងៃទី ៩ ខែតុលា ករណីជំងឺគ្រុនឈាមចំនួន ២២.៨១៨ករណីបន្ថែមទៀត ត្រូវបានកត់ត្រា បន្ទាប់ពីមនុស្ស ៧៩.៥៩៩នាក់ បានឆ្លងកាលពីខែមុន។

ទិន្នន័យរបស់អគ្គនាយកដ្ឋានសេវាសុខភាព បានបង្ហាញថា ករណីជំងឺគ្រុនឈាមថ្មីសរុបចំនួន ២.៦៦០ករណី រួមទាំង ៦៤៩ករណីនៅក្នុងទីក្រុង Dhaka ត្រូវបានរាយការណ៍ក្នុងរយៈពេល ២៤ ម៉ោង រហូតដល់ម៉ោង ៨:០០នាទីព្រឹក ម៉ោងក្នុងតំបន់កាលពីថ្ងៃចន្ទ។

ចំនួនករណីជំងឺគ្រុនឈាមសរុប ដែលបានរាយការណ៍ចាប់តាំងពីដើមខែមករា ឡើងដល់ ២២៦.២២៤ករណី។ 

ជំងឺគ្រុនឈាម គឺជាជំងឺត្រូពិកឆ្លងតាមរយៈមូសខ្លា ដែលបង្កឡើងជាវីរុសគ្រុនឈាម។ រោគសញ្ញាអាចរួមមានគ្រុនក្តៅខ្លាំង ឈឺក្បាល ក្អួតចង្អោរ ឈឺសាច់ដុំ និងមានកន្ទួលនៅលើស្បែក។