ក្រុមអាជ្ញាធរអ៊ីស្រាអែល និយាយថា តំបន់ហ្គាហ្សាស្រ្ទីប ស្ថិតនៅលើមាត់ជ្រោះនៃវិបត្តិមនុស្សធម៌ថ្មី បើសិនជាការផ្គត់ផ្គង់មិនត្រូវបានអនុញ្ញាតឲ្យចូល ស្របពេលដែលអ៊ីស្រាអែលឆ្លើយតបនឹងការវាយប្រហាររបស់ក្រុមជីវពលហាម៉ាស់ ។ 

 កាលពីថ្ងៃចន្ទម្សិលមិញ អ៊ីស្រាអែល បានប្រកាសការឡោមព័ទ្ធទាំងស្រុងលើដែនដីបិទច្រកមួយនេះ ដោយពួកគេនិយាយថា ចរន្តអគ្គិសនី ចំណីអាហារ និងទឹក នឹងត្រូវកាត់ផ្តាច់ ។ 

 យោងតាមការអះអាងរបស់ក្រុមអ្នកស្រុក បានឲ្យដឹងថា ជំនួយលែងទៅដល់តំបន់បិទព្រំដែនមួយនេះ ចាប់តាំងពីថ្ងៃសៅរ៍មកម្ល៉េះ ។ 

 រូបភាពវីដេអូឃ្លីបពី BBCឃើញផ្លូវថ្នល់ដែលគេបោះបង់ចោលគ្របដណ្តប់ដោយគំនរបាក់បែកពីសាកសពអគារ បន្ទាប់ពីការវាយប្រហារតាមច្រកអាកាសរបស់អ៊ីស្រាអែល ។ 

 តំបន់មួយនេះ មានប្រជាពលរដ្ឋរស់នៅប្រហែល ២,៣លាននាក់នេះ ក្នុងនោះប្រហែល ៨០ភាគរយនៃពួកគេពឹងផ្អែកលើជំនួយមនុស្សធម៌ ដោយសារតែជម្លោះជាមួយអ៊ីស្រាអែល ។ 

 នៅទីនេះគ្រប់គ្រងដោយក្រុមជីវពលហាម៉ាស់ ប៉ុន្តែអ៊ីស្រាអែលគ្រប់គ្រងដែនអាកាស និងតំបន់ឆ្នេររបស់ពួកគេ ។ តំបន់មួយនេះ ត្រូវបានរឹតត្បិតការឆ្លងកាត់ទំនិញ និងមនុស្សនៅទូទាំងតំបន់ព្រំដែន ។ 

 ដោយឡែក ប្រទេសជិតខាងអេហ្ស៊ីប បានរឹតត្បិតការឆ្លងកាត់ព្រំដែនជាមួយតំបន់ហ្គាហ្សាផងដែរ ។ 

 ចាប់តាំងពីការវាយប្រហារចាប់ផ្តើមកាលពីព្រឹកថ្ងៃសៅរ៍មក អ៊ីស្រាអែល បានបញ្ឈប់ការផ្គត់ផ្គង់ទាំងអស់ដែលចូលក្នុងតំបន់ហ្គាហ្សា ដែលរួមទាំងស្បៀងអាហារ និងឱសថ ៕