ជនប៉ាឡេស្ទីន និងក្រុមអ្នកសារព័ត៌មាន បានចូលរួមពិធីបុណ្យសពដែលរៀបចំឡើងនៅថ្ងៃអង្គារនេះ សម្រាប់សហការីពួកគេ ២រូប ដែលត្រូវបានសម្លាប់ដោយសារការវាយប្រហារមីស៊ីលអ៊ីស្រាអែល ពេលវាធ្លាក់ត្រូវចំអគារដែលពួកគេកំពុងធ្វើសេចក្តីរាយការណ៍ ។ ក្រុមអ្នកសារព័ត៌មានសរុប ៦នាក់ ត្រូវបានសម្លាប់នៅក្នុងតំបន់ហ្គាហ្សាស្រ្ទីប ចាប់តាំងពីថ្ងៃសៅរ៍រហូតមក ។ 

លោក Mona Oqal គឺជាអ្នកសារព័ត៌មានមួយរូបដែលបានចូលរួមពិធីបុណ្យសពនេះ និយាយថា ស្ថានភាពពិតជាឈឺចាប់ខ្លាំងណាស់ វាពិបាកខ្លាំង ហើយគ្មានសុវត្ថិភាពតាល់តែសោះ សម្រាប់ក្រុមអ្នកសារព័ត៌មានទាំងអស់ ។ 

អ៊ីស្រាអែល បាននិយាយនៅថ្ងៃអង្គារនេះថា ពួកគេដណ្តើមបានការគ្រប់គ្រងឡើងវិញតំបន់ព្រំដែនហ្គាហ្សា វាយប្រហារយ៉ាងសន្ធាប់លើតំបន់បិទជិតមួយនេះ ជាមួយនឹងការវាយប្រហារតាមច្រកអាកាសដ៏ខ្លាំងក្លាបំផុត ក្នុងប្រវត្តិសាស្រ្តរយៈពេល ៧៥ឆ្នាំកន្លងមកនេះនៃជម្លោះរបស់ពួកគេជាមួយប៉ាឡេស្ទីន បើទោះបីជាក្រុមហាម៉ាស់ គំរាមប្រហារជីវិតចំណាប់ថ្នូរក៏ដោយ ។ 

អ៊ីស្រាអែល បានសន្យាថា នឹងសងសឹកយ៉ាងចាស់ដៃ ចាប់តាំងពីក្រុមខ្មាន់កាំភ្លើងជីវពលហាម៉ាស់ វាយប្រហារទីក្រុងរបស់ខ្លួន បណ្តាលឲ្យសាកសពមនុស្ស ស្លាប់រាយប៉ាយពាសពេញដងផ្លូវ អំឡុងការវាយប្រហារស្លាប់មនុស្សច្រើនបំផុតនៅក្នុងប្រវត្តិសាស្រ្តរបស់ពួកគេ ។ 

យោងតាមការអះអាងរបស់ក្រុមមន្រ្តីនៅតំបន់ហ្គាហ្សា បានឲ្យដឹងថា មនុស្សជិត ៧០០នាក់ ត្រូវបានសម្លាប់ដោយសារការវាយប្រហារតាមច្រកអាកាសរបស់អ៊ីស្រាអែល ស្របពេលដែលស្រុកទាំងមូលនៅតំបន់ហ្គាហ្សា បានរាបដល់ដី ។ 

ដោយឡែក សារព័ត៌មានអ៊ីស្រាអែល រាយការណ៍ថា ចំនួនមនុស្សស្លាប់ដោយសារការវាយប្រហាររបស់ក្រុមហាម៉ាស់ បានកើនឡើងដល់ជាង៩០០នាក់ ៕