ភ្នំពេញ៖ នារសៀលថ្ងៃទី១០ ខែតុលា ឆ្នាំ២០២៣ នៅទីស្ដីការក្រសួង ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាបានទទួលជួប​ពិភាក្សា​ការងារ​ជាមួយ លោកជំទាវ Sibille de Cartier d’Yves ឯកអគ្គរាជទូតប៊ែលហ្ស៉ិកប្រចាំតំបន់ (កម្ពុជា ថៃ ភូមា និង ឡាវ) ដោយផ្ដោតលើការលើកកម្ពស់គុណភាពអប់រំនៅកម្ពុជា។

លោកជំទាវ Siblle de Cartier dYves បាន​បង្ហាញ​ពីឆន្ទៈ​ក្នុង​ការ​បន្ត​ជួយ​គាំទ្រ​ដល់​វិស័យអ​ប់រំ​នៅ​ក​​ម្ពុជា តាមរយៈការផ្តល់ជូនវគ្គបណ្តុះបណ្តាលធនធានមនុស្ស ក៏ដូចជាកម្មវិធីថ្នាក់បណ្ឌិត និង​អនុបណ្ឌិតជាមួយសកលវិទ្យាល័យល្បីៗមួយចំនួន នៅប្រទេសប៊ែលហ្ស៉ិក។

ក្នុងកិច្ច​សហប្រតិបត្តិការជាមួយក្រសួងអប់រំ យុវជន និងកីឡា លោកជំទាវបាន លើក​ឡើង​ពី​សមិទ្ធផល​ធំ​ៗ​ដែល​សម្រេច​បានរួមមាន៖ បណ្តុះបណ្តាលធនធានមនុស្ស (កម្រិតបណ្ឌិត ចំនួន​១០​នាក់ និងកម្រិតម៉ាស្ទ័រចំនួន ២៣នាក់) បង្កើតឲ្យមាន Double Degree Program សម្រាប់​កម្ម​វិធី​ថ្នាក់​បណ្ឌិត​ជាមួយសកលវិទ្យាល័យមួយចំនួននៅ ប្រទេសបែលហ្ស៉ិកតាមរយៈម៉ូដែល Co-Supervision system សាងសង់អន្តេវាសិកដ្ឋាន១ខ្នងសម្រាប់និស្សិតនារី (ចំនួន ៥០នាក់) បាន​បង្កើត និងបំពាក់សម្ភារៈពិសោធន៍សម្រាប់ដេប៉ាតឺម៉ង់សំណង់ និងដេប៉ាតឺម៉ង់មេកានិច ទំនើប​កម្មបណ្ណាល័យដោយបំពាក់នូវប្រព័ន្ធគ្រប់គ្រងបណ្ណាល័យ សៀវភៅ និង​ការ​បណ្ដុះ​បណ្ដាល​បណ្ណារក្ស ពង្រឹងហេដ្ឋារចនាសម្ព័ន្ធ IT និងបានជួយអភិវឌ្ឍប្រព័ន្ធ គ្រប់គ្រងសាលារៀន (school management system) កសាងសមត្ថភាព​អ្នក​ស្រាវជ្រាវ​ តាមរយៈ​ការ​ផ្តល់​កញ្ចប់​ថវិកា​ស្រាវជ្រាវ​ដល់​អ្នក​ស្រាវជ្រាវវិទ្យាស្ថាន ដាក់ឱ្យដំណើរការនូវ​ការិយាល័យ​ទំនាក់​ទំនង​សហគ្រាស​។

ក្នុង​ឱកាសនេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រី បានថ្លែងអំណរគុណ និង​វា​យតម្លៃខ្ពស់ចំពោះកិច្ចសហប្រតិបត្តិការ និងការជួយគាំទ្រពីរដ្ឋាភិបាលបែលហ្សិក ដោយ​ផ្ទាល់​ជា​មួយវិទ្យាស្ថានបច្ចេកកម្ពុជា និងតាមរយៈអង្គការ VVOB ដែលកំពុង​អនុវត្ត​សកម្ម​ភាព​ខ្លួន​ស្រប​តាម​កិច្ច​ព្រមព្រៀងគម្រោងជាមួយក្រសួងអប់រំយុវជន និងកីឡា រយៈពេល៥ឆ្នាំ (២០២២- ២០២៦) ដែលបានផ្តល់វគ្គបំប៉នពាក់ព័ន្ធនឹង ១). ការពង្រឹងវិធីសាស្ត្របង្រៀន និងរៀន​គណិត​វិទ្យា​កម្រិត​បឋមសិក្សា ២). ប្រសិទ្ធភាពនៃការគ្រប់គ្រងថ្នាក់រៀន ៣). ការគាំទ្រ​គណៈ​គ្រប់​គ្រង​វិទ្យា​ស្ថាន​គរុកោសល្យ និងសាលាបឋមសិក្សាលើផ្នែកភាពជាអ្នកដឹកនាំសាលារៀន យេនឌ័រ និង​សាលា​មេត្រី​បរិស្ថាន៕