ភ្នំពេញ៖ គណបក្សខ្មែរតែមួយ នៅថ្ងៃទី១១ តុលា ឆ្នាំ ២០២៣នេះ បានចេញលិខិត ប្រកាសថា មានគោលបំណងធ្វើសម្ព័ន្ធភាពជាមួយគណបក្សប្រជាជនកម្ពុជា ដែលមានសម្ដេចតេជោ ហ៊ុន សែន ជាប្រធានគណបក្ស ដើម្បីរួមគ្នាការពាររដ្ឋធម្មនុញ្ញឆ្នាំ ១៩៩៣ ព្រមទាំងរួមគ្នាការពាររាជរដ្ឋាភិបាលស្របច្បាប់ដែលបានកើតឡើងតាមរយៈការបោះ ឆ្នោតក្នុងអាណត្តិនីមួយៗ។

សេចក្ដីប្រកាសបានបញ្ជាក់ថា ​គណបក្សខ្មែរតែមួយ មានគោលនយោបាយស្រដៀងគ្នា​ជាមួយ​គណបក្សប្រជាជនកម្ពុជា និងជាពិសេស “តម្លៃសន្តិភាព" គឺជាវត្ថុបំណងរួមរបស់ប្រជាពលរដ្ឋខ្មែរ​ដែលត្រូវការ ចូលរួមការពារសុខសន្តិភាពទាំងអស់គ្នា ​ដើម្បីរក្សាស្ថិរភាពនយោបាយ និងធ្វើឱ្យប្រទេសកម្ពុជា ​បន្តការអភិវឌ្ឍរីកចម្រើនជាលំដាប់។

គណបក្សខ្មែរតែមួយក៏បានអំពាវនាវដល់គណបក្សនយោបាយនានា ដែលបានចុះបញ្ជី​ស្របច្បាប់​នៅក្នុងក្រសួងមហាផ្ទៃ ​សូមចូលរួមបង្កើតសម្ព័ន្ធភាពជាមួយគណ បក្សប្រជាជនកម្ពុជា ដើម្បីរួមគ្នា​ជាកម្លាំងប៉ូលនយោបាយថ្មីមួយដើម្បីកម្ពុជា ​និងប្រជាពលរដ្ឋខ្មែរ ឆ្ពោះទៅថ្ងៃអនាគត៕