ភ្នំពេញ៖អង្គការ សមាគម ក្រុមយុវជននានា និងប្រជាពលរដ្ឋខ្មែរ គាំទ្រ ចំពោះ​គោល​នយោបាយ​របស់​ក្រសួង​បរិស្ថាន ស្តីពី (យុទ្ធនាការការដាំដើមឈើ ១លានដើមជារៀងរាល់ឆ្នាំ)។ ពិសេស​ស្រប​តាម​យុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា ក្នុងដំណាក់កាលទី១ នៃមុំទី២ ទី៤ និង​ទី៥ គឺធានាចីរភាពនៃការអភិវឌ្ឍសង្គម សេដ្ឋកិច្ច និង​កសាង​ភាព​ធន់​ទៅ​នឹង​ការ​ប្រែប្រួល​អាកាស​ធាតុ ការអភិវឌ្ឍប្រកបដោយភាពធន់ ចីរភាព និងបរិយាបន្ន ដោយជំរុញការលើកកម្ពស់ ការ​ទាក់ទាញវិនិយោគ ក្នុងឧស្សាហកម្មដែលមានតម្លៃបន្ថែមខ្ពស់ និងឧស្សាហកម្មបៃតង។

រដ្ឋាភិបាល​មានផែនការរក្សាគំរបព្រៃឈើឲ្យបាន ៦០ភាគរយ នៅឆ្នាំ២០៣០។ លោក ហេង សំណាង ប្រធានក្រុមយុវជនសង្គមស៊ីវិល បានគូសបញ្ចាក់ថា កិច្ចការ​បរិស្ថា​ន​គឺ​មាន​ភាព​សំខាន់​ជា​សកល​ ដូចនេះ ប្រជាជលរដ្ឋគ្រប់រូបមានតាតព្វកិច្ចលើកស្ទួយចូលរួមមក្នុងកិច្ចការសង្គម ព្រោះ​កន្ល​ង​មកមាន សកម្មជនបរិស្ថាន សមាគម អង្គការមិនមែនរាជរដ្ឋាភិបាលមួយចំនួន តែង​តែ​យក​បរិស្ថាន ធ្វើជាឧបករណ៍នយោបាយ និង ធ្វើសកម្មភាពផ្ទុយនឹងច្បាប់ ហើយបង្កើតវប្បធម៌រិះគន់ ជាន់​ពន្លិច ជាដើម។ យើងខ្ញុំក៏សូមអំពាវនាវ ដល់ សកម្មជនបរិស្ថាន មួយចំនួន សូម​បញ្ឈប់​សកម្មភាព​ផ្ទុយ​នឹងច្បាប់នានា ហើយចូមរួមជាមួយរាជរដ្ឋាភិបាល។

ក្រុម​យុវជនសង្គមស៊ីវិល និងប្រជាជនខ្មែរ មានជំនឿចិត្តយ៉ាងមុតមាំ ចំពោះ កម្មវិធីនានា ដែល​ដាក់​ចេញ​ដោយ ក្រសួងបរិស្ថាន មានដូចជា៖

ទី១ ជំរុញ និងចូលរួមក្នុងយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ» ចាប់ពីថ្ងៃទី០១ ខែកញ្ញា ឆ្នាំ២០២៣ និងរហូតដល់ពេលនេះ មានការ​ចូល​រួម​ពី​សាលា​គ្រប់​កម្រិត​ទូទាំង​ប្រទេស​ប្រមាណ​ជាង ​១ម៉ឺន ១ពាន់ និងសិស្សានុសិស្ស ដែលជាយុវជនជំនាន់ក្រោយជាង ១,៥លាននាក់។  

ទី២ គឺការស្តារ និងដាំដើមឈើឡើងវិញ ដើម្បីឈានឆ្ពោះទៅទទួលបាននូវអព្យាក្រឹតកាបូន និង​ការ​លើកកម្ពស់ជីវភាពប្រជាសហគមន៍ ឆ្លើយតបទៅនឹងការប្រែប្រួលអាកាសធាតុ។  

ទី៣ បង្កើនគម្របព្រៃឈើឲ្យបាន៦០% តាមរយៈការដាំដើមឈើ១លានដើម ក្នុងមួយឆ្នាំ រួម​ទាំង​ការ​ដាំឫស្សី ដើម្បីបង្កើនគម្របព្រៃ និងបង្កើនជីវភាពប្រជាជន ព្រមទាំង​ការ​ចូលរួម​ជា​មួយ​ដៃ​គូ​នានា ដោះស្រាយបញ្ហាសកល ដែល​យក​ចិត្ត​ទុក​ដាក់​ជា​ចម្បង​ទៅ​លើការ​ប្រែប្រួល​អាកាស​ធាតុ​ជា​សកល​។

ជាចុង​ក្រោយបណ្តុំអង្គការសង្គមស៊ីវិល សូមអំពាវនាវដល់ប្រជាពលរដ្ឋ សិស្ស និស្សិត ចូល​រួម​ជា​មួយ​ ក្រសួងបរិស្ថាន ដើម្បីធនធានធម្មជាតិ សង្គមជាតិយើង៕