លោកវេជ្ជបណ្ឌិត លី សុវណ្ណ ប្រធាននាយកដ្ឋានប្រយុទ្ធ នឹងជំងឺឆ្លង នៃក្រសួងសុខាភិបាល បាន​ប្រាប់​BTV ព័ត៌មាន នាព្រឹកថ្ងៃទី១១ ខែតុលា ឆ្នាំ២០២៣នេះថា មកដល់ពេលនេះមន្រី្តជំនាញ រក​ឃើញករណីជំងឺផ្តាសាយបក្សី H5N1 ចំនួន២ករណីហើយ គឺឆ្លងលើបុរសអាយុ៥០ឆ្នាំ និង​កុមារី​អាយុ​២ឆ្នាំ សុទ្ធតែបានស្លាប់ទាំងអស់។

លោកវេជ្ជបណ្ឌិត លី សុវណ្ណ បានលើកឡើងថា ករណីជំងឺផ្តាសាយបក្សីទាំងពីរករណីនេះ គឺ​បុរស​អាយុ៥​០ឆ្នាំ នៅថ្ងៃទី៧ ខែតុលា ឆ្នាំ២០២៣ មានទីលំនៅក្នុងភូមិម្រាក់ទាប ឃុំត្រស់ ស្រុក​រមាស​ហែក ខេត្តស្វាយរៀង និងកុមារីអាយុ២ឆ្នាំ នៅថ្ងៃទី៩ ខែតុលា ឆ្នាំ២០២៣ មាន​ទីលំនៅ​ក្នុង​ភូមិ​ឆ្មា​លោត ឃុំស្នោងខាងត្បូង ស្រុកកំចាយមារ ខេត្តព្រៃវែង ត្រូវ​បាន​បញ្ជាក់​ថា​ វិជ្ជមាន​វីរុស​ផ្តាសាយបក្សី H5N1 សុទ្ធតែបានស្លាប់ទាំងអស់។ ដោយសារមានការផ្ទុះជាបន្តបន្ទាប់ មន្ត្រី​ជំនាញ​បាន​ចុះរុករក អ្នកដែលប៉ះពាល់ផ្ទាល់ជាមួយអ្នកជំងឺ ក៏ដូចជា​ប្រជាពលរដ្ឋ​ដែល​រស់​នៅ​ក្នុង​ភូមិមានមាន់ ទា ឈឺស្លាប់ ដែលមានជារោគសញ្ញានោះ មានចំនួនជិត៣០នាក់ មន្ត្រី​ជំនាញ​បាន​ពិនិត្យ​ធ្វើ​តេស្ត គឺជាលទ្ធផលអវិជ្ជមានវីរុសផ្តាសាយបក្សី H5N1 ទាំងអស់។

លោកវេជ្ជបណ្ឌិត លី សុវណ្ណ ប្រធាននាយកដ្ឋានប្រយុទ្ធ នឹងជំងឺឆ្លង បានបញ្ជាក់ទៀតថា បច្ចុប្បន្ន​ក្រសួង​សុខាភិបាល មានមនី្ទរពិសោធន៍ដែលមានសមត្ថភាពខ្ពស់ អាច​ទទួល​ធ្វើ​តេស្ត​គ្រប់​ពេល​វេលា​ទាំង​អស់ មិនថាថ្ងៃឈប់សម្រាក មិនថាយប់ ឬថ្ងៃនោះទេ គឺមន្រី្តរបស់យើងធ្វើការទាំងថ្ងៃ ទាំង​យប់។ ជាពិសេសរហូតមកទល់នឹងម៉ោងនេះ ប្រទេសជាតិយើងនៅតែមានសុវត្ថិភាព ដោយ​សារ​យើង​បានទប់ស្កាត់ការរីករាលដាលនេះប្រកបដោយប្រសិទ្ធភាពខ្ពស់ ដោយមាន​កិច្ច​សហការ​ជា​មួយ​មន្ត្រីជំនាញពាក់ព័ន្ធ ក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន ក្រសួង​សុខាភិបាល​ រួមនឹងអាជ្ញាធរដែនដី ហើយយើងក៏ប្តេជ្ញារួមគ្នាទប់ស្កាត់ជំងឺផ្តាសាយបក្សីH5N1នេះ កុំ​ឲ្យ​មានការរីករាលដាលទៅតំបន់ដទៃទៀត។ តែទោះបីជាយ៉ាងណាក៏ដោយ លោកវេជ្ជបណ្ឌិត សុំ​សំណូមពរថា ការងារនេះមិនបានជោគជ័យ១០០%នោះទេ ប្រសិនបើ​គ្មាន​ការ​ចូល​រួម​ពី​ប្រជា​ពលរដ្ឋ។ ដូច្នេះសុំប្រជាពលរដ្ឋទាំងអស់ កុំយកមាន់ ទា ឈឺ ឬងាប់ មកធ្វើជាអាហារ បើ​ឃើញ​មាន់ ទា ឈឺ ឬងាប់ ត្រូវដុតចោល ឬដុតចោល និងត្រូវរាយការណ៍ទៅអាជ្ញាធរមូលដ្ឋាន ឬ​ក៏​មន្ត្រី​ជំនាញ​៕ អត្ថបទ រដ្ឋា