លោក Oleg Starynskyi គ្រូបង្វឹកក្រុមភ្នំពេញក្រោន បានបង្ហាញសុទិដ្ឋិនិយម ចំពោះ​ការប្រជែង​កៅ​អីវគ្គ​បន្ដ នៃពានរង្វាន់ AFC Cup 2023/24 ​បន្ទាប់​ពីមើល​ឃើញ​បេក្ខភាព​ក្នុង​ពូល​F ​មាន​កម្រិត​​សមត្ថភាព​ប្រហាក់ប្រហែលគ្នា ។

ការលើកឡើងនេះ ស្របពេលក្រុមភ្នំពេញក្រោន បានយកឈ្នះគូប្រកួត ២ប្រកួតជាប់គ្នា ក្នុង​វគ្គ​ចែក​ពូល នៃពានរង្វាន់កម្រិតទី២ ប្រចាំទ្វីបអាស៊ីនេះ ដោយមិនរបូតគ្រាប់សូម្បី ១គ្រាប់ ពោល​គឺ​បាន​យក​ឈ្នះក្រុ​មម្ចាស់ផ្ទះ Cebu FC របស់ហ្វីលីពីន ៣-០ មុនបន្ដយកឈ្នះក្រុមភ្ញៀវ Shan United ​របស់មីយ៉ាន់ម៉ា ៤-០ កាលពីថ្មីៗ មុនជួបក្រុម Macarthur FC មកពីអូស្ដ្រាលី បញ្ចប់​ជើង​ទី​១ ​នាចុងខែតុលានេះ ។



លោក Oleg ថា នេះជាឱកាសល្អ សម្រាប់ក្លិប និងវិស័យបាល់ទាត់កម្ពុជា ដើម្បី​បើក​ទំព័រ​ប្រវត្តិ​សាស្ដ្រ ​ក្នុងការឈានទៅវគ្គបន្ដ ដែលខ្ពស់ជាងវគ្គចែកពូល ហើយអាចធ្វើឲ្យក្លិបបាល់ទាត់កម្ពុជា ទទួល​បាន​កៅអីកាន់តែច្រើន ដើម្បីចូលរួមការប្រកួតពានរង្វាន់ AFC Cup នារដូវកាលក្រោយៗ ដែល​ផ្ទុយពីឆ្នាំនេះ កម្ពុជាទទួលបានត្រឹមកន្លះកៅអីប៉ុណ្ណោះ ។

គួរដឹងថា បន្ទាប់ពីយកឈ្នះ Cebu FC និង Shan United ក្នុងជើងទី១ ភ្នំពេញក្រោន នឹ​ង​ត្រូវ​បើក​ទ្វារ​ផ្ទះទ​ទួលក្រុម Macarthur FC ដែលកំពុងមាន ៦ពិន្ទុក្នុងដៃស្មើគ្នា នាថ្ងៃទី២៦ ខែតុលា នៅ​ពហុកីឡដ្ឋានជាតិអូឡាំពិក មុនធ្វើដំណើរឆ្លងទ្វីប ទៅជួបក្រុមអូស្ដ្រាលីនេះវិញម្ដង នៅ​ជើង​ទី២ នាថ្ងៃទី៩ ខែវិច្ឆិកា ។ បន្ទាប់មកបើកទ្វារផ្ទះទទួលក្រុម Cebu FC របស់ហ្វីលីពីន នៅ​ជើង​ទី២​ វិញម្ដង នាថ្ងៃទី៣០ ខែវិច្ឆិកា មុនការប្រកួតបញ្ចប់ពូល F ជាមួយក្រុមម្ចាស់ផ្ទះ Shan United នាថ្ងៃទី១៤ ខែធ្នូ ឆ្នាំ២០២៣ ខាងមុខ៕ អត្ថបទ លី ឈុនឡា