​បាល់ទាត់៖ ​ក្រុមបាល់ទាត់​ជំរើសជាតិ​អង់គ្លេស​ បាន​យកឈ្នះ​អូទ្រីស ១-០ ក្នុង​ជំនួប​មិត្តភាព​កំដៅ​សាច់ដុំ​ត្រៀម Euro ២០២០ ដែល​នឹង​ចាប់ផ្ដើម​នៅ​ថ្ងៃ​ទី​១២ ខាងមុខ​។

​​ការប្រកួត​ដែល​ធ្វើឡើង​នៅ​កីឡដ្ឋាន Riverside Stadium របស់​ក្លិប​ Middlesbrough កីឡាករ​យុវជន Arsenal, Bukayo Saka ជា​អ្នក​រក​បាន​គ្រាប់​ជ័យជំនះ​ ១​គ្រាប់​គត់ តែ​ក្រុម​របស់​លោក Gareth Southgate ក៏​ជួប​នឹង​បញ្ហា​របួស​ដែរ​ នៅ​ពេល​ខ្សែ​ការពារ​ស្តាំ​របស់ Liverpool, Trent Alexander-Arnold ត្រូវ​បាន​ផ្លាស់ប្ដូរ​ចេញ​នៅ​ចុង​ម៉ោង​។ នេះ​ជា​ជ័យជំនះ ៧ប្រកួត​ជាប់​គ្នា​ហើយ​សំរាប់​អង់គ្លេស​ក្នុង​ជំនួប​មិត្តភាព​អន្តរជាតិ ដែល​ស្មើនឹង​ស្ថិតិ​កាលពី​ឆ្នាំ១៩៨៥-៨៦ នៅ​ពេល​នោះ​អង់គ្លេស​ក្រោម​ការដឹកនាំ​របស់ Sir Bobby Robson​។

​​អង់គ្លេស​ស្ថិត​ក្នុង​ពូ​ល D ដោយ​នឹង​ត្រូវ​ជួប​ជាមួយ​ក្រូ​អាស៊ី​មុនគេ​នៅ​ថ្ងៃ​ទី​១៣ ខែ​មិថុនា​ខាងមុខ មុន​បន្ត​ជួប​ស្កុ​ត​ឡេ​ន និង​ចុងក្រោយ​ជួប​សាធារណរដ្ឋ​ឆេ​ក​។ ​​ចំណែក​អូទ្រីស​ស្ថិត​ក្នុង​ពូ​ល C ដោយ​នឹង​ត្រូវ​ជួប​ម៉ា​សេ​ដ្វា​ន់​ខាងជើង​នៅ​ថ្ងៃ​ទី​១៣ មុន​បន្ត​ជួប​ហូ​ឡង់ និង​អ៊ុយ​ក្រែ​ន​។ ​ចំ​ណែក​លទ្ធផល​ជំនួប​មិត្តភាព​ផ្សេងទៀត​យប់មិញ ​មាន​ដូច​ជា​បារាំង​យកឈ្នះ​វែ​ល ៣-០, អាល្លឺម៉ង់​ស្មើ​ដា​ណឺ​ម៉ាក ១-១ ខណៈហូ​ឡង់​ស្មើ​ស្កុ​ត​ឡេ​ន ២-២​៕

​អត្ថបទ​៖​នាង សុភា​វុ​ធ