ប៉ាឡេស្ទីន ៖ ប្រជាជនប៉ាឡេស្ទីន នៅតំបន់ហ្គាសា បានប្រារព្ធពិធីបុណ្យសពដ៏ធំមួយ សម្រាប់សមាជិក២នាក់នៃការិយាល័យនយោបាយរបស់ក្រុមហាម៉ាស់ គឺលោក Jawad Abu Shammala និងលោក Zakaria Abu Maamar ដែលបានស្លាប់ដោយសារការវាយប្រហារតាមអាកាសនៅទីក្រុង Khan Younis ភាគខាងត្បូងតំបន់ហ្គាសា កាលពីថ្ងៃអង្គារ (ទី១០ ខែតុលា)។ យោធាអ៊ីស្រាអែលបាននិយាយថា ពួកគេត្រូវបានវាយប្រហារពេញមួយយប់។

អ្នកទាំង២ គឺជាសមាជិកជាន់ខ្ពស់របស់ក្រុមហាម៉ាស់ដំបូងគេ ដែលត្រូវបានសម្លាប់ ចាប់តាំងពីអ៊ីស្រាអែល បានចាប់ផ្តើមវាយលុកតំបន់នោះ។ អ៊ីស្រាអែលបាននិយាយថា លោក Abu Shammala បានដឹកនាំប្រតិបត្តិការជាច្រើន ដែលផ្តោតលើជនស៊ីវិលអ៊ីស្រាអែល ហើយលោកជាសមាជិកការិយាល័យនយោបាយរបស់ក្រុមហាម៉ាសទទួលបន្ទុកកិច្ចការសេដ្ឋកិច្ច។

ក្រសួងការបរទេសប៉ាឡេស្ទីន បានឲ្យដឹងថា ការវាយប្រហាររបស់អ៊ីស្រាអែល ចាប់តាំងពីថ្ងៃសៅរ៍ចុងសប្ដាហ៍កន្លងមក បានបំផ្លាញលំនៅឋានជាង ២២.៦០០ខ្នង និងកន្លែងសុខភាព ១០កន្លែង និងបំផ្លាញសាលារៀន ៤៨កន្លែង។

ចំណែកឯសមាជិកក្រុម Hezbollah ២រូប គឺលោក Ali Ftouni និង Hussam Ibrahim ដែលបានស្លាប់អំឡុងការបាញ់ផ្លោងរបស់អ៊ីស្រាអែល កាលពីថ្ងៃចន្ទ (ទី៩ ខែតុលា) ក៏ត្រូវបានប្រជាជនប្រមូលផ្តុំគ្នាធ្វើបុណ្យសពសម្រាប់អ្នកទាំង២ ដែរ កាលពីថ្ងៃអង្គារ (ទី១០ តុលា)។

មនុស្ស ៦នាក់ ត្រូវបានសម្លាប់ នៅថ្ងៃចន្ទនោះ ក្នុងនោះសមាជិកក្រុម Hezbollah ៣នាក់ មន្ត្រីអ៊ីស្រាអែលម្នាក់ និងពួកសកម្មប្រយុទ្ធប៉ាឡេស្ទីន ២នាក់ ដែលបានចាប់ផ្ដើមបញ្ឆេះអំពើហិង្សាដោយការជ្រៀតចូលទឹកដីអ៊ីស្រាអែលពីលីបង់។ ភាពតានតឹងបានកើនឡើងចាប់តាំងពីក្រុមអ៊ីស្លាមប៉ាឡេស្ទីនហាម៉ាស បានធ្វើការវាយប្រហារដ៏គួរឲ្យភ្ញាក់ផ្អើលមួយលើអ៊ីស្រាអែលពីតំបន់ហ្គាហ្សាស្ទ្រីប កាលពីថ្ងៃសៅរ៍ ដោយបានសម្លាប់មនុស្ស ៩០០នាក់ ចាប់ជាចំណាប់ថ្នូររាប់សិបនាក់ និងចាប់ផ្តើមបង្កើតសង្រ្គាម ដែលប្រជាជនប៉ាឡេស្ទីនជិត ៧០០នាក់ ត្រូវបានសម្លាប់ផងដែរ។

ក្រុមសកម្មប្រយុទ្ធ Hezbollah ត្រូវបានសម្លាប់ ក្នុងពេលមានការសងសឹកដោយការបាញ់ផ្លោងរបស់អ៊ីស្រាអែល។ ក្រុម Hezbollah បានតបតវិញដោយការបាញ់ប្រហារទៅលើទីតាំងកងទ័ពអ៊ីស្រាអែលចំនួន២ ដោយមិនមានរបាយការណ៍ថាមានអ្នករងរបួសនោះទេ។ Hezbollah បានហៅវាថាជាការឆ្លើយតបដំបូង ដែលសញ្ញាបន្ថែមទៀត នឹងមកដល់៕