អាមេរិក ៖ សហរដ្ឋអាមេរិក កំពុងបញ្ចប់ជំនួយភាគច្រើនដល់ប្រទេសនីហ្សេ បន្ទាប់ពីបានសន្និដ្ឋានកាលពីថ្ងៃអង្គារថា រដ្ឋប្រហារ បានដណ្តើមកាន់កាប់ប្រទេសអាហ្វ្រិកខាងលិចនេះ ចាប់តាំងពីរដ្ឋាភិបាលដឹកនាំដោយជន    ស៊ីវិលរបស់ខ្លួន ត្រូវបានផ្ដួលរំលំក្នុងខែកក្កដា។

ប្រទេសដែលដឹកនាំតាមបែបប្រជាធិបតេយ្យ បានដួលរលំនៅថ្ងៃទី២៦ ខែកក្កដា នៅពេលដែលលោក ប្រធានាធិបតី ម៉ូហាម៉េដ បាហ្ស៊ូម (Mohamed Bazoum) និងក្រុមគ្រួសាររបស់លោក ត្រូវបានចាប់ខ្លួន និងឃុំឃាំងដោយឆ្មាំការពារប្រធានាធិបតី។

នៅក្នុងសេចក្តីថ្លែងការណ៍មួយរបស់ក្រសួងការបរទេសអាមេរិកកាលពីថ្ងៃអង្គារ ក្រុមមន្ត្រី បាននិយាយថា វិធានការក្នុងការកាត់ជំនួយទុកនេះ នឹងត្រូវបាបញ្ជាក់នៅក្នុងច្បាប់ស្តីពីការអនុគ្រោះប្រចាំឆ្នាំរបស់ក្រសួងនេះ ដោយអនុលោមតាមមាត្រា៧០០៨។ ច្បាប់ស្តីពីការអនុគ្រោះរបស់រដ្ឋាភិបាល ត្រូវបានប្រើប្រាស់ ដើម្បីរារាំងជំនួយហិរញ្ញវត្ថុមិនឲ្យទៅដល់រដ្ឋាភិបាលដែលគ្រប់គ្រងដោយរបបយោធា។

ក្រុមមន្ត្រី បាននិយាយថា៖ «កាលពីថ្ងៃទី៥ ខែសីហា សហរដ្ឋអាមេរិក បានផ្អាកជាបណ្តោះអាសន្ននូវកម្មវិធីជំនួយបរទេសមួយចំនួនដល់  រដ្ឋាភិបាលនីហ្សេ ដែលមានទឹកប្រាក់សរុបជិត ២០០លានដុល្លារ។ ជំនួយនោះឥឡូវនេះ ក៏ត្រូវបានផ្អាកផងដែរ ដោយយោងតាមមាត្រា៧០០៨នៃច្បាប់ស្តីពីការអនុគ្រោះប្រចាំឆ្នាំរបស់ក្រសួងការបរទេស»។