អាមេរិក ៖ បើយោងតាមសមាគមលោតឆ័ត្រ Skydive Chicago & Parachute Association និងប្រព័ន្ធផ្សព្វផ្សាយក្នុងស្រុក បានរាយការណ៍ថា ស្ត្រីវ័យ ១០៤ឆ្នាំរស់នៅក្រុង Chicago សហរដ្ឋអាមេរិក គឺលោកយាយ Dorothy Hoffner បានទទួលមរណៈភាពហើយ កាលពីថ្ងៃចន្ទ (ទី៩ តុលា) បន្ទាប់ពីលោកយាយបានលោតពីលើយន្តហោះ កាលពីមួយសប្ដាហ៍កន្លងទៅ នៅក្នុងអ្វីដែលត្រូវបានគេជឿថា ជាកំណត់ត្រាពិភពលោកថ្មី សម្រាប់អ្នកលោតក្នុងលំហអាកាស ឬលោតឆ័ត្រ ដែលមានវ័យចំណាស់ជាងគេបំផុត នៅលើពិភពលោក។

មួយសប្តាហ៍មុននេះ ពោលគឺនៅថ្ងៃអាទិត្យ ទី១ ខែតុលា លោកយាយ Hoffner បានទុករទេះរុញ ដែលជួយទប់គាត់ពេលដើរនៅដោយឡែកសិន រួចលោតពីលើយន្តហោះ ក្នុងរយៈកម្ពស់ ១៣.៥០០ហ្វីត (ប្រមាណជា ៤១១៤,៨ម៉ែត្រ) នៅឯកន្លែងលោត Skydive Chicago ក្នុងទីក្រុង Ottawa រដ្ឋ Illinois។

បន្ទាប់ពីបានធ្វើនូវអ្វីដ៏គួរឲ្យស្ងើចសរសើរហើយនោះ លោកយាយបាននិយាយនាពេលនោះថា៖ «វាពិតជាអារម្មណ៍ដ៏អស្ចារ្យមួយ ដែលមានអារម្មណ៍ថា ផែនដីកំពុងនៅក្រោមអ្នក។ នៅពេលដែលអ្នកមានអារម្មណ៍ល្អ អ្នកអាចធ្វើរឿងទាំងនេះបាន។ ពេលខ្លះអ្នកមានការភ័យខ្លាច ឬភ័យខ្លាច ក្នុងការធ្វើរឿងនេះ ប៉ុន្តែប្រសិនបើអ្នកទទួលបានអារម្មណ៍ល្អហើយនោះ កុំអល់អែក ធ្វើរឿងនោះចុះ»។

ស្ថាប័នគ្រប់គ្រងកំណត់ត្រាពិភពលោក Guinness បានចូលរួមក្នុងពេលលោកយាយ Hoffner លោតនេះដែរ ប៉ុន្តែមិនទាន់បានបញ្ចប់ដំណើរការនៃការបញ្ជាក់ពីកំណត់ត្រានៅឡើយទេ។ ដូច្នេះ កំណត់ត្រាបច្ចុប្បន្ន នៅតែជារបស់លោកយាយ Linnéa Ingegärd Larsson វ័យ ១០៣ឆ្នាំមកពីប្រទេសស៊ុយអែត ដែលបានលោតក្នុងខែឧសភា ឆ្នាំ២០២២៕