ភ្នំពេញ ៖ លោក ឡាយ រស្មី ប្រធានការិយាល័យរដ្ឋាករស្វយ័តដឹកជញ្ជូនសាធារណៈរថយន្តក្រុងនៅរសៀលថ្ងៃទី១១ ខែតុលានេះ បានប្រាប់BTVឱ្យដឹងថា គិតមកដល់ពេលនេះ ថ្នាក់ដឹកនាំ និងក្រុមការងារ បានត្រៀមរថយន្ត និងត្រួតពិនិត្យបច្ចេកទេសរថយន្តរួចអស់ហើយសម្រាប់ដឹកកម្មករ-និយោជិត និងប្រជាពលរដ្ឋ ពីភ្នំពេញទៅតាមបណ្តខេត្ត ដោយឥតគិតថ្លៃ ក្នុងឱកាសពិធីបុណ្យភ្ជុំបិណ្ឌ ដែលចាប់ផ្តើមដំណើរការពីថ្ងៃស្អែករហូតដល់ថ្ងៃទី១៦ខែតុលា ឆ្នាំ២០២៣។

លើសពីនេះ លោកបានបន្តថា កន្លងទៅ នៅថ្ងៃទី០៩ខែតុលានេះ លោកកែវ ចាន់ណារិទ្ធ អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង រាជធានីភ្នំពេញ បានប្រជុំណែនាំដល់អ្នកបើកបរទាំងអស់ ត្រូវបើកបរគោរពច្បាប់ចររាចរណ៍ និងអនុវត្តតាមគោលការណ៍ណែនាំរបស់ថ្នាក់ដឹកនាំដែលកំណត់។

យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ បានឱ្យដឹងថា សេវារថយន្តក្រុងសាធារណៈសម្រាប់ដឹកកម្មករ-និយោជិត និងប្រជាពលរដ្ឋ ធ្វើដំណើពីរាជធានីភ្នំពេញទៅតាមបណ្តាខេត្ត និងពីបណ្តាខេត្តត្រលប់មករាជធានីភ្នំពេញវិញប្រើប្រាស់រថយន្តក្រុងចំនួន៣៩៥គ្រឿង ដែលមានគោលដៅដូចជា៖

ទី១.ពីភ្នំពេញទៅខេត្តកណ្តាល-ព្រៃវែង-ស្វាយរៀង ធ្វើដំណើតាមផ្លូវជាតិលេខ១ ចេញពីស្ថានីយរថយន្តក្រុងវាលស្បួវ រហូតដល់ចំណតទីរួមខេត្តព្រៃវែង និងស្វាយរៀង។

ទី២.ពីភ្នំពេញទៅខេត្តកណ្តាល-តាកែវ ធ្វើដំណើតាមផ្លូវជាតិលេខ២ ចេញពីមុខព្រះវិហារយេស៊ូគ្រីស្ទ ទល់មុខកងរាជអាវុធហត្ថរាជធានីភ្នំពេញ រហូតដល់ចំណតរង្វង់មូលអូរចំបកខេត្តតាកែវ។

ទី៣.ពីភ្នំពេញទៅខេត្តកែប-កំពត ដ្វើដំណើតាមផ្លូវជាតិលេខ៣ ចេញពីស្ថានីយរថយន្តក្រុងផ្លូវ២០០៤ រហូតដល់ចំណតសាលាបឋមសិក្សាដំណាក់ចង្អើរខេត្តកែប និងចំណតរថយន្តក្រុងទីរួមខេត្តកំពត។

ទី៤.ពីភ្នំពេញទៅខេត្តកំពង់ស្ពឺ-ព្រះសីហនុ ធ្វើដំណើតាមផ្លូវជាតិលេខ៤ ចេញពីស្ថានីយរថយន្តក្រុងផ្លួវ២០០៤ រហូតដល់ចំណតរថយន្តផ្សារកំពង់ស្ពឺ និងវិមានឯករាជ្យ ខេត្តព្រះសីហនុ។

ទី៥.ពីភ្នំពេញទៅកំពង់ឆ្នាំង-ពោធិ៍សាត់-បាត់ដំបង-បន្ទាយមានជ័យ ធ្វើដំណើតាមផ្លូវជាតិលេខ៥ ចេញពីស្ថានីយរថយន្តក្រុងសួនច្បារឫស្សីកែវ រហូតដល់ចំណតរថយន្តផ្សារលើខេត្តកំពង់ឆ្នាំង-ទីតាំងបុរីឧញ៉ា ភូ ពុយ ខេត្តពោធិ៍សាត់-ចំណតរថយន្តផ្សារភូ ពុយខេត្តបាត់ដំបង និងចំណតរថយន្តក្រុងសេរីសោភ័ណ្ឌ ខេត្តបន្ទាយមានជ័យ។

ទី៦.ពីភ្នំពេញទៅខេត្តកំពង់ធំ-សៀមរាប ធ្វើដំណើតាមផ្លូវជាតិលេខ៦ ចេញពីដីឡូតិ៍តំបន់OCICជ្រោយចង្វារ រហូតដល់ចំណតភោជនីយដ្ឋានស្ទឹងសែន ខេត្តកំពង់ធំ និងបុរីរដ្ឋបាលខេត្តសៀមរាប(ផ្លូវ៦០ម៉ែត្រ)។

ទី៧.ពីភ្នំពេញទៅខេត្តកំពង់ចាម-ត្បូងឃ្មុំ ធ្វើដំណើរតាមផ្លូវជាតិលេខ៦ និង ៧ ចេញពីរថយន្តក្រុងរង្វង់មូលកួចកាណុង រហូតដល់ចំណតរថយន្តខេត្តកំពង់ចាម និងចំណតផ្សារសួងខេត្តត្បូងឃ្មុំ។

និងទី៨.ពីភ្នំពេញទៅក្រចេះ និងស្ទឹងត្រែង តាមផ្លូវជាតិលេខ៨ និង១៣ ចេញដំណើរពីស្ថានីយរថយន្តក្រុងរង្វង់មូលកួចកាណុង រហូតដល់ចំណតមន្ទីរវប្បធម៌ និងវិចិត្រសិល្បៈខេត្តក្រចេះ និងសាលាខេត្តស្ទឹងត្រែង។ រថយន្តក្រុងសាធារណៈចាប់ផ្តើមចេញដំណើរពីម៉ោង៦:៣០នាទី ដល់ម៉ោង១១:៣០នាទីព្រឹក ចាប់ពីថ្ងៃទី១២ដល់ថ្ងៃទី១៦ ខែតុលា ឆ្នាំ២០២៣។ អត្ថបទ ៖ ទូច សោភ័ណ